Kaupapa: Tūhoe

Kua poroporoākitia te kaumātua nō Tūhoe a Tiwi Black e tōna iwi

Mere McLean
  • Waikato/Te Waiariki

He pou ō roto o te hui ahurei a Tūhoe, ko te whakatīnanatanga mai ia o te hāpai-ō, ko Tiwi Black tērā ka poroporoākitia i tōna marae o Ōhotu, i Ruātoki i tēnei rā.

E mōhio whānuitia ana ia mō āna mahi ā-hapori i te rohe whānui o Te Moana nui a Toi, he toki hākinakina i ōna rā, he kaipāmu, he kai ahuwhenua toa ka ngaro nei.

Hei tā Nikora Taipeti, “I whakatinanahia i ngā tūmanako o rātou mā, o te kaupapa ano, ko te huri te whenua, ko te ahuwhenua hei oranga mo ngā whānau.”

I whakahokia mai a Tiwi Black ki Ohotu Marae i te Tūrei whai muri i tōna matenga.  I tērā taha o te huarahi o te marae, ko tōna pāmu rongonui.  I te tangihanga, ka whakamaharatia tōna ngākaunui ki te manaaki i te tangata. 

Hei tā Taipeti, “Ka taea au te kī, nā ngā i whakawhānui wēra tumanako, karekau hoki tōna ngākau i noho ki roto i ōna whānau i huri kē ki te awhi i tōna iwi."

Ko Tiwi Black tētahi o ngā pou o te ahurei o Tūhoe.  Nāna ētahi whakataunga nui i mua i te hui, i te hui tōna, otirā i te mutunga hoki o ngā mahi.

E waru tekau mā rima tau te pakeke o te pēperekou nei ka mate.