Kua pōhiritia te motu e te Kiingi Māori

Heeni Brown
  • Waikato/Te Waiariki

Ki Ngāruawāhia, ko ngā iwi o te motu ērā te whakaeke atu ki Tūrangawaewae Marae, ki te Koroneihana tuangahuru a Kiingi Tuuheitia. Me te aha, ko ia tonu tērā i puta ki te mahau o Māhinarangi ki te whakarongo ki ngā take maha e whakatakororia ana ki runga i te marae.

Ko te kīngi tērā i pōhiri ake i te Whare Ariki o Te Heuheu, nānā rā ngā ope i arataki, kia tangihia ai ngā mate o te motu.

O ngā mate, ko te kanohi kitea ki ngā Koroneihana a Ngapo Wehi i whakanuia. I tae atu a ia ki ngā Koroneihana i te wā i a Koroki, i a Te Atairangikaahu tae noa mai ki a Kingi Tuheitia.

Ae, ko ngā kahika o te motu te whakaeke mai nei, me te here anō i ngā taura whiri ki te Kīngitanga.    

"Ko tētahi o ngā mahi a te Kīngitanga ko te mana motuhake, ko te whakakotahi i ngā iwi. Koina tētahi o ngā kaupapa i whaia nei e o mātou mātua, e o mātou tipuna. A, kua ngaro rātou anei mātou hei whakatīnana i tērā āhuatanga,” hei tā Rikirangi Gage no Te Whānau a Apanui.

"Ko Ngāti Porou, ko ngā iwi o Te Tairāwhiti kua haramai ki te manaaki i tana koroneihana ki te whakatīnana i te kōrero o te whakatūtanga o Mahinarangi nā Waikato i hua te whakaaro nā Te Tairāwhiti i āwhina,” hei tā Herewini Parata no Ngāti Porou

Heoi anō rā, i meia te Minita Whakawhanake Māori kia kaua e hou mai ki te waha i te mana-kāwanatanga i tēnei rā.

"Te Ururoa haramai, haramai, haere mai koe a Rangiwewehi i tēnei rā rukeruke atu tō pōtae o te kāwanatanga mō āpōpo koe whakaeke mai ai" (Hahahahaha) "Tēnei rā kua Te Arawa tangata, ha, māu kē koe e whakapaipai,” hei tā Rāhui Papa, he mangai o te Kingi Māori.

"He uaua tā te mea i tae Māori mai engari ka kii atu ētahi kahore he kaitōrangapū koe, he aha atu rānei engari kua kawea mai e mātou te matenga o Rob Cooper me ētahi o ngā whanaunga o te kainga ki runga o te marae nei koina te kaupapa Māori i te tuatahi,” hei tā Peeni Henare no te Pāti Reipa.