Kaupapa: Kapa Haka

Kua piki te taumata o ngā kapa haka o Ngāti Kahungunu

Aroha Treacher
  • Te Tai Rāwhiti

Kua piki te taumata o ngā kapa haka o Ngāti Kahungunu i te whakataetae kapa haka a motu i tū ai ki Te Wairoa i te rangi nei, e tekau mā whā ngā kapa e pakanga ana kia whai waahi atu ki Te Mataini hei te tau rua mano tekau mā iwa. 

"Tino harikoa te ngākau, mai i tāku kitenga kua piki ake te katoatia o ngā kapa haka mai i Ngāti Kahungunu ki tētahi taumata ake, nā reira te motu kia tūpato mai ki a mātou o Ngāti Kahungunu," e katakata mai ana a JB Heperi-Smith.
Kātahi anō a Ngāti Kahungunu ka hautū i pīnakitanga o te ao kapa haka i tō rātou rohe ara ko Te Matatini i te tau rua mano tekau mā whitū.


"Koina hoki te mea nui te taenga mai rānei o Te Matatini ki kōnei ka whakake ngā kapa ka kake te taumata o ngā whakaaturanga nō reira ngā kī a Matatini he tino mihi atu nei ki koutou mō te tūnga mai Te Matatini ki kōnei," tā Hira Huata, Te Kahu o Te Amorangi.

E whā rau ngā kaihaka e whakataetae ana ki te atamira, ko te whai, kia tohu i a rātou tētahi o ngā roopu e whā ka uru atu ki Te Matatini.

He whakatipuranga hōu tēnei mō tātou te iwi Māori he whakatipuranga hoki hōu tēnei kua puta i tētahi hua pai tētahi hua rawe ki ngā iwi katoa o te motu," tā te rangatahi a Grace Tahuri.

Kua tuku atu te mauri ki to rohe o Wairarapa, mā rātou anō e hautu te whakataetae a motu e heke mai nei.