Kaupapa: Health

Kua pāngia te tama a Dr Lance O’Sullivan e te mate Duchenne Muscular Dystrophy

Dean Nathan
  • Te Tai Tokerau

He rongo e urupatu nei i te whānau o Takuta Lance O'Sullivan ko te pānga o te mate Duchenne Muscular Dystrophy ki tana tamaiti a Lance.  Ā, koinei hoki te ra kua tohua hei tuku whakamārama ki te ao mō tēnei mate weriweri. 

Ko te pā mai o te mate Duchenne Muscular Dystrophy ki te pōtiki o ngā tamariki a Lance rāua Tracey O'Sullivan, he rongo ohorere e patu kino nei i te whānau.

E ai ki a Dr Lance O'Sullivan, “Kua pau ngā kaha o ngā uaua o ngā muscles o te tīnana o ngā tamaiti pēnei.  Ā, i tēnei wā kahore i te pai ia mō te omaroa, mō te pekepeke i ētahi wā e tino ngenge ana.  Ā te wā ka huri ia ki te tūru wira.

I tēnei wā e whakaaro ana au i tēnei wā me ngā rā kua pahure ake nei, he aha ai he aha ai?  Ko tōku mahi kia whakapakari i te hauora o ngā tamariki.  Ā, koina koina.  I tēnei wā nei i te pukuriri i te pōuri  e tangi ana mātou i tēnei wā ko te mea nui e tautoko ana mātou i tō mātou tamaiti.”

E meatia ana, e ono tekau ngā tamariki o te motu kua pāngia e tēnei ngārara whakamate he tamatāne te nuinga.  He mate ka whakangoikore i ngā waewae me ngā ringa, kātahi ka huri ki ngā pūkahukahu me te manawa.

Hēoi anō, he rata tēnei kua whawhairoa mō te hauora o ngā tamariki, kua ara mai anō ki te ārahi i te whawhai ki tēnei mate weriweri.

Ki tā Dr Lance O'Sullivan, “I ngā ra ō-mua ko ngā pakanga ehara i te pakanga mōku mō tōku whānau noa iho, ehara he pakanga tērā nō tōku whānau i tēnei wā he pakanga nō tōku whānau mō tā māua tamaiti nē ngā tamariki katoa pēnei i a ia.”