Ngā kaupapa: Housing, Te Arawa

Kua pana atu ngā Kaihāpai i te Ora tokorua i tō rāua wāhi tāwharau

  • Waikato/Te Waiariki

Kua whakatīkokihia te waka āwhina tangata ā tētahi tokorua e kaha nei ki te hāpai i te ora o te hapori ki Rotorua. Ināia tata nei i puare ai te whare tāwharau a Lara Northcroft rāua ko Wetini Mitai-Ngatai i te pokapū, engāri ākuanei ka panaia atu rāua hei te mutunga o te marama nei.

Ahakoa ngā uauatanga, ka whāngai tonu a Northcroft rāua ko Mitai-Ngatai i te hunga rawa kore.

“Kua mea mai te rangatira nōnā te whare kei te whakakorehia tā mātou kirimana ki reira,” i kī atu a Mitai-Ngatai.

Nō tērā marama rātou ko Tiny Deanne i whakapūare ai i te wāhi tāwharau hei whāngai i ngā kai kore utu o te parakuihi me te poutūtanga o te rā. Tōna rima tekau ngā tāngata i tae atu.

“He tata rawa pea ki ētahi o ngā tāngata, he whakarato anō ō rātou. Ahakoa i raro i ngā mahi āwhina tangata ko ētahi kāore e whakaae kia haere tērā momo tangata arā, te hunga kāinga kore ki reira.”

Ināianei e kimi kāinga hōu ana rāua.

“Ko te tumanako ka whai whare hōu, kāore he herehere ki runga i a mātou. Mēnā tunu kai i te ata, i te ahiahi rānō, kei te pai ki ngā tāngata nō mātou taua whare.”

Ahakoa mate ana a kāinga tahi, ka ora kāinga rua, ka tākoha ngā kai ki ngā kaihāpai i te ora i a Percy Poharama me tana tira.

“Kei te hoatuhia ngā kai o Mitai, ia pō ngā toenga kai ka haere ki tō mātou hoa, koia me tana rōpū kei te whāngai i wā tātou whanau i ngā pō. Kei te mihia ahau māua ko taku hoa ki ngā tāngata kua roa nei e mahi ana i wēnei mahi.”

E manako ana rāua kia mahi ngātahi ki te taha o ngā rōpū hapori me ngā pakihi.