Kua neke whakamua te āwhero nui o Tūhourangi kia whakatū i tētahi marae ki Tarawera

Mere McLean
  • Waikato/Te Waiariki

Kua neke whakamua te āwhero nui o ngā uri a Tūhourangi kia whakatū i tētahi marae ki Tarawera nō muri atu i te rewanga o ngā whakaritenga o te kaupapa i tēnei wiki. 

Ko te kaumātua nei o Tūhourangi, a Anaru Rangiheuea te taituara e kitea ai te tūnga o tētahi marae ki Tarawera.

Hei tā Rangiheuea, “Mai te hū o Tarawera, i ngaro mātou i te whenua, i te rū, te nuinga o aku tīpuna kei kona tonu e takoto ana i raro i ngā paru me te parekura o te mate o Tūhourangi i tērā wā.” 

Koinei te marae tutahi kua waihangatia ki te takiwā nō muri noa mai i te te hū o Tarawa i te tau kotahi mano, waru rau, waru tekau mā ono.  He mea whakangaro atu te whenua me te tangata nō Tūhourangi.

Ki tā Rangiheuea, “Ko ahau i tīmata ki te hoki mai, engari me hoki mai ki te aha, karekau he kāinga, karekau he whare, ā, koina au e whakaaro ana me tū tētahi whare ahakoa he pakupaku rānei, he rahi rānei hei kāinga mō Tūhourangi.” 

E ai ki te kaiwaihanga whare, a Fred Stevens ka tata ki te rua miriona tara te utu mō tēnei kaupapa. 

Ka whaowhia te whare hōu nei ki ngā papa hiko, matapihi hoki.  Heoi, ko tā Anaru Rangiheuea tirohanga matua, me Māori tonu te tū o te whare nei, kia ū hoki ki ngā tikanga marae a Tūhourangi.

E ai ki a Rangiheuea, “I whakaaro ana, mō taku tūpuna a Tūhourangi he tino rangatira, kei te mōhio a Te Arawa ki tana kaha na tana pāpā a Rangitihi i tohungia a Tūhourangi i runga i wana tuākana.”

Kua whakaae ngā kaitiaki whenua o Rotomahana kia whakawātea i te rima heketea o te whenua mō tēnei kaupapa, he moemoeā kua nuku atu i te kotahi rau tau e wawatatia ana.