Kaupapa: Kapa Haka

Kua mate te tohunga toi whakaari a Tama Huata

Heeni Brown
  • Te Tai Rāwhiti

He poupou anō nō te Tairāwhiti kua hinga, ko Tama Huata tēnā, e ono tekau mā whā ōna tau ka ngaro nei.

I mate te ringa whao i te whare tāpere o Ngāti Kahungunu i tōna kāinga i Ahuriri i te ata nei i roto i te uma o tōna whānau.

Ko tā te whānau Huata ko Tama Tūranga Huata tō rātou "poutokomanawa."

I roto i tō rātou kauhau ki te motu, ko te whānau tonu tērā i āwhina i a ia i tōnā hā whakamutunga.

Ki te tangihanga o Tākuta Apirana Mahuika rere hoki ngā mihi poroporoāki mōna.

Hei tā Kahautu Maxwell, "Anō kua tae atu a Tama Huata i a koe, kōrua, kōrua kua roa e nonoke nei ki ō kōrua mate."

I te tau rua mano mā ono, ka tohua a Tama Huata ki te kāhui kahurangi o te motu, mō tōnā whakapau kaha ki ngā mahi a rēhia.

I tōnā wā, i tū a ia ki te tūranga heamana mō te kāhui tiaki i ngā rawa kapa-haka o te motu, arā a Te Matatini.

Ā, nāna tonu i timata ngā tuku taonga waiata Māori o te motu.

I waho atu o tana mahi mō te motu, ko ia rā tērā i ārahi i ngā mahi o te iwi me te whakahaere i te whetiwara o Takitimu ka tū ia toru tau.

Ko tētahi o ngā tino mahi āna, ko te tūwheratanga o te rōpū Kahurangi Dance Theatre, me te kura o Takitimu Performing Arts i te tau waru tekau mā toru.

Ko ia hoki te tuatahi ki te hanga i tētahi tohu whare wānanga mō ngā mahi a rēhia,

A te iwa karaka āpōpō, ka tukuna te tūpāpaku ki Waipatu Marae, kātahi ka tere te hāere ki Mihiroa Marae, ki Pakipaki a te Paraire.

A te Rātapu ka tanumia ki te rua-kōiwi o ōnā mātua ki Whenuakura.