Ngā kaupapa: Australia, Indigenous

Kua mahi tahi ētahi kaitaurima taketake ki te whakaatu i tā rāua tautoko mo te Iwi Moemoea

  • Ahitereiria
Mural created in Melbourne by Jason Manukau and a fellow artist at the Powerhouse

Kua mahi tahi tētahi kaitaurima Māori rāua ko tētahi kaitaurima no te Iwi Moemoeā ki te pani i tētahi kōwaiwai matarahi hei whakaatu i te tautoko mo te whāinga ki te whakakore i te kapinga o ngā hapori tuawhenua rua rau kō atu ki te Hauāuru o Ahitereiria.

Kua whakanuia a Jason Manukau, he kaitaurima no Tainui me Ngāti Mahuta ki ngā tōpito katoa o te ao mo āna pūkenga toi. Inā kua kaha rata atu te marea ki tana kōwaiwai matarahi o tētahi tamaiti iwi moemoea kua peitahia ki runga i tētahi o ngā pakitara o te Power House ki Poipiripi.

Ko tā te hunga e tautoko ana i tēnei kaupapa he pikitia e kawe ana i te wairua o te whawhai o ngā uri moemoea.

Kua roa nei a Jason Manukau e whakamahi i āna pūkenga ki te whakamārama atu ki te aō i ngā kaupapa e ngākaunuitia ana e ia, nā whai ano kua kaha hono mai ētahi whetū o te ao ki te whakamana i āna mahi, ko The Rock me TYGA ētahi noaiho o aua tāngata rongonui.

Kei te kaha pupū ake te tautoko o te iwi Māori ki Ahitereiria mo te Iwi Moemoea, inā e pēra tonu ana ki Aotearoa nei.

Kua whakaritea ētahi huihuinga ki Aotearoa hei whakaatu atu ki te marea te hiahia a ngā kaitautoko ki te waiho i ngā hapori tuawhenua , kia kaua e kati.

He kaupapa ka whakahāerehia hei tēnei Rahoroi ki Tāmaki, ko Tama Waipara rāua ko Fran Kora ētahi o te hunga ka hau atu ki te tautoko.

Hei te marama e tū mai nei he kaupapa ano ka tū ki te puku o te tāone o Tāmaki, ki Ahitereiria ano hoki ki raro i te kaupapa Official Call to Action to Stop the Forced Closure of Aboriginal communities.

E rere hāere tonu ana ngā taupatupatu e hāngai ana ki tēnei kaupapa, ā ahakoa e kaha kōrerotia ana e te nuinga e noho mū ana te Pirimia o Aotearoa a John Key.

Ahakoa tērā kua kaha ngā Mema Paremata Māori ki te whakaputa i ā rātou ake whakaaro mo tēnei take.

Hei te wiki e tū mai nei ka tau mai te Pirimia o Ahitereiria a Tony Abbott mo tētahi kaupapa e pā ana ki a Anzac.

Mo ētahi atu whakamārama mo ngā kaupapa kei te whakahāerehia, tēna whakapā atu ki ngā hononga ki raro nei.

https://www.facebook.com/events/1377563769237233/permalink/1379938748999735/

https://www.facebook.com/events/1560990274154721/