Kaupapa: Entertainment

Kua kōwhiria tētahi taitama Māori hei whakakī i te tūranga kaiwhakaari matua

  • Waikato/Te Waiariki

E takatū ana a Tammy Davis, tērā i mōhiotia ake ko Munter i te hōtaka Outrageous Fortune, ki te ringatohu i tōna kiriata tuatahi e whakatairanga ana i te ao kani o nāia, ko 'Born to Dance' te ingoa.  Ā, kua kōwhiria e ia tētahi kanohi hōu nō Te Kura Kaupapa Māori o Rākaumangamanga i Rāhui Pokeka, hei whakakī i te tūranga o te kaiwhakaari tāne matua.

I kawe atu a Tia Taharoa Maipi i te ope hanga kiriata ki tōna hapori, ā, i haere tahi ngā kāmera o Te Kāea.

Nei rā ko ngā whetū o te kiriata hōu a Tammy Davis, e kiia nei ko 'Born to Dance'.

Ko te wahine, ko Kherington Payne he kaiwhakaari, kaikanikani hoki, kua tau mai i tōna whenua ake o Amerika, ko te tāne he uri Māori, he kaikanikani i te ope Royal Family, he tauira nō te Kura o Rākaumangamanga, kua whakahoki mai i ōna hoa kaimahi hōu ki tōna wā kāinga.

Hei tā te ringatohu, e mōhio whānuitia ana mō tōna wairua whakakata, he mea nui ki a ia te tohu i tētahi o ngā tūranga matua, hei Māori, me te mea nei, ko Tia Taharoa te tangata.

Ko te tirohanga Māori tētahi anake o ngā taha kua āta hōparatia e Davis i tēnei tōna kiriata tuatahi hei ringatohu.

I runga tonu i te tautoko o tōna whānau me ngā mātāpono o te momo kura, kua whakatipu i tēnei ihupuku, kei te maringanui anō rātou i a ia.

Tuaritia: