Kaupapa: Crime

Kua karanga ake tētahi kaumātua nō Ngāti Pūkeko kia mataara tōna hapori whai muri i tētahi ahi

updated Mere McLean
  • Waikato/Te Waiariki

Kei te āki ngā māngai tīnei ahi o Te Moana nui a Toi kia tū tētahi rāhui ahi; he kōrero kua toko ake nā ngā muranga ahi e rua, tētahi i pā tata atu ki ētahi whare ki Poroporo.  Otirā kua karanga ake a Julian Tunui, kaumātua nō Ngāti Pūkeko, kia mataara tōna hapori o Poroporo.  

Ko ngā mahuetanga iho o te ahi i te Rāmere. E rua ngā waka ahi i tau ki te tiriti o Ranapia, Poroporo.

E ai ki te kaumātua, a Julian Tunui, “Waimārie i kore, i kore i whara ngā whānau, e noho ana i tērā taha o te rori, nā te mea i moata te taenga mai o ngā tāngata whawhai i te ahi, koinei i tāpihia rātou te ahi i mua i te taenga kē ki to rātou whare.” 

Kua ōhiti ngā whakaaro mō tēnei ahi. Kei kō noa ko ētahi kāinga me tētahi marae. 

Ki tā Tunui, “Whēna i tīmata noa iho te ahi, pai tēnā, engari mena i tīmatahia e ngā rangatahi pea? Kāre e tino pai ki ahau tērā tūmomo āhuatanga.”

Ki te tiriti matua tuarua i konei tētahi atu ahi i ngā wiki e rua ki muri.  Ko te āki a ngā kai tinei ahi o Whakatāne, kia tū tētahi rāhui ahi.

He wā hārukiruki ahakoa te tuku tonu a ngā kaunihera i ngā raihana mō ngā rā e toru. Ko tāku hei te mutunga o te wiki kāre e kore ka tū te rāhui ahi.

E rāngona ana a Hineraumati me tōna kaha, engari ko ngā pānga kē o Hinemahuika hei aronga nui mā tātau.