Kua kapi ngā hui rongo kerēme o Whangarei Terenga Paraoa

Dean Nathan
  • Te Tai Tokerau

Ehara i te mea i hokona ai ngā whenua tupuna engari he mea tukua kē e ngā matua ki raro i ngā tikanga Māori.  Koinei tetahi o ngā korero matua ki te ra whakamutunga o te Taraipiunara o Waitangi e whakarongo ana ki ngā nawe o ngā hapū maha ki te riu o  Whangarei Terenga Paraoa. 

Kua kitea i roto i te mangu me te mā, ko ngā ritenga a ngā tupuna o Ngāti Kahu o Torongare me tauiwi mo te whenua, ehara i te hoko engari he tuku.

He marama te aronga o ngā korero i roto i te whakatakotoranga o ngā nawe ngā mamae me ngā hēmanawatanga kua kawea e ngā uri mai i tera atu rautau.

E mea ana ngā hapu rangatira, taka mai ki te ra nei kei te hoko tonu te karauna i ngā taonga o te whenua ehara hoki no rātou.

Koinei te nohonga tuarima a te Taraipiunara ki roto o Ngāpuhi i tenei tau engari ko taua karere ra ano kia rātou, kihai rawa ngā hapu rangatira o Whangarei Terenga Paraoa i tuku i te mana o tēnei kainga ki tētahi kē atu.