Kua huri ngā kēnge ki Rauhoto Marae whai muri i te matenga o Birch

Mere McLean
  • Waikato/Te Waiariki

Kei te whakatikatika a Ngāti Rauhoto i tō rātou whare, whai muri i te matenga o Wiremu Desmond Birch i Taupō i ngā wiki ki muri.

I te rā nei, i hui tahi te whānau o Birch rātou ko ngā pirihimana, ko ngā mema kēnge o te Māpu Mangarū me Mangu Kaha ki runga o Rauhoto Marae, i Taupō nui a Tia.

Ko te wa tuatahi tēnei mō te whānau o Wiremu Desmond Birch te tūtaki ki ngā rōpū kēgne hei tatau pounamu, e whakātu ana te whānuitanga o ngā take kēnge kei te hapori o Taupō.

I mate a Wiremu Desmond Birch i ngā haora o te ata hāpara o te tekau mā tahi o tēnei marama ki te takiwā o Paetiki, Taupō nui a Tia.  He toru tekau te pakeke o te kaikōhuru kua mauhere mō tēnei tū mahi, heoi ko te āki a ngā kaiwhakarite o tēnei hui he kaupapa tēnei ka pā ki te katoa.

Ko ētahi o ngā take nui i wānangahia ki roto i te hui nei kia noho ko te marae hei whakatau i ngā raru, ā, kia whakatu huarahi e taea ai te hunga rangatahi te noho i te taha o ngā kaumātua hei whakapuaki whakaaro.

Ki te hunga i tae mai, ko tā rātou koinei katoa te whakatīnanatanga o te Whānau Ora e kimi whakautu mō ngā raru, kia kore anō e tau te ārai o te mate i runga i te tūmeke.