Kua hūnuku te tangi o tētahi kōhungahunga na tētahi ahi ki Mōkai Marae

Mere McLean
  • Te Tai Tokerau
  • Waikato/Te Waiariki

Kei te hunuku atu te tangihanga o tētahi kōhungahunga e toru tau te pakeke mai te marae o Mokai, patata atu ki Taupo, ki waahi kee atu whai muri i te pakaru mai o tetahi ahi i roto i te wharekai.

I te marae i te ra nei ta matou karere a Mere McLean i te waa i hoki atu etahi whanau ki te marae kia kite ai ratou i nga paanga o Hine Mahuika.

I rongo ngā whānau i te auahi ki Mokai Marae i te ata nei.

Ki tā Eru George te kaikorero ma Mokai Marae, “Ka nui te mamae, ta te mea, ko tēnei whare ko Parehingaawatea, ana, ko Parehingaawatea koia te hoa rangatira a to mātou whare a Pakake Taiari.”

Ko tā Eru George, i pakarū te ahi ki roto i te whare kai, Parehingaawatea i te ahiahi o nanahi, i tāua wā i tū tētahi tangihana ki te Marae.

Hei tāna, “Ka karangahia te whare, hara mai rā ki te tina, inanahi nei, me te aue, kua timata mai te ahi.”

Ko tā Eru George anō, i tu te Marae i raro i ngā ture arahi a Te Ratonga Tinei Ahi.  Heoi, kaare he whakahoho i roto i te wāhanga kai a te marae, me te kīhini.  Engari, hei tāna kei te koa te pōari whakahaere o te Marae kīhae tētahi i whara, ā, i te inuhea ngā whare i kaingia e Hine Mahuika.

Hei tāna, “No te ata tonu nei, i tae rawa mai, me te kī, pai noa iho koutou, kua ea taua nama, ana, kātahi anō kia timata mātou ki te whakarite i ngā mahi, kia whakatūngia tētahi wāhi hōu, wharekai hoū.”

Hei āpōpō ka whakatū etahi taiapa, kia noho haumaru ai tēnei wāhi, ko te whakatau a ngā kaumātua o Mokai Marae, ka noho aukati tēnei wāhi tae ano ki te wā e tū ai tētahi whare kai hōu.