Kaupapa: Kapa Haka

Kua huaina ko Te Wharekura o Rākaumangamanga ngā toa o Te Kura Wiwini, Te Kura Wawana

Heeni Brown
  • Te Tai Rāwhiti

Ko te rangi whakamutunga tēnei o nga whakataetae kapa haka o ngā kura tuarua o te motu, ki Tūranganui-ā-Kiwa, ā, kātahi anō ka oti ngā whiringa toa. Ko wai ngā whakaihu waka o Te Kura Wiwini, Te Kura Wawana? Kua huaina ko Te Wharekura o Rākaumangamanga ngā toa mō te tau rua mano, tekau mā whā.

I toa i a Rākaumangamanga te whakaeke, te mōteatea me te reo. Ā, ko Te Puku o te Ika anō ngā toa o te mōteatea me te whakawātea hoki. Nō Tāmaki Makaurau ngā toa o te waiata-a-ringa me te haka, ko Waiorea me Hoani Waititi ērā. Ā, ko Te Rōpu Raukura o Rotorua ngā toa mō te poi.

I te wāhanga mātāmuri,e rua ngā toa mō te waiata tira. Nō Ngāti Kahungunu ki Heretaunga hoki te manukura kōhine toa, ā, nō te heikura o Western Heights i Rotorua te manukura tāne toa.

Ka mutu, ko ngā kura toa, tuatoru mai ko Ngā Puna o Waiorea, tuarua mai, ko Te Rōpu Raukura, ā, ko te kura toa, ko Rākaumangamanga

Te āhua nei kua angitū te whakaurutanga o te rauna whiringa toa ki te raupapa whakataetae o Ngā Kura Tuarua o Te Motu. Kaimātakitaki mai, kaihaka mai, i whakaae mai te nuinga kātahi ko te āpititanga ki te taiopenga ko tēnei. Mō ngā kaihaka o ngā kapa e iwa i eke ki te whiringa toa nei tērā te whakahīhī, te ngākau iti, ko rātou e para ana i te ara o whiringa toa mō ngāi kaihaka taiohi.