Kua hoki mai te ope kātua o Aotearoa i Vanuatu

  • Tāmaki Makaurau

He waka i wehe atu ki ngā raru āwha ki Vanuatu, i hoki mai i te ata nei ki ngā āwha o Tāmaki Makaurau.

Koia tērā ko te Kaipuke Heremana HMNZS Canterbury me tōna tira ope kātua o Aotearoa, kua kotahi marama e toro atu ana i te ringa awhina ki ngā iwi i haukerekerehia e āwha Pam, i te marama o Poutū te Rangi.

Tua atu i te kotahi rau rima tekau ngā hōia tauā moana, ngā hōia Tūmatauenga me ngā hōia tauā rereangi i runga i te waka i wehe atu mai Aotearoa, hei āwhi i te whenua i turakitia e te āwha. He kai, he wai, he rongoa i mauria atu.

E ai ki a Pīpīwharauroa Campbell, “Tino pouri ki te kite i te, e kīa nei te devastation ki kora, engari he pai ki te ngākau ki te hoatu i te awhi ki a rātou.”

Hei tā Maxine Kearns, “I mahi tahi mātou ko ngā hōia a Tūmatauenga ki te tuku āwhina, me te aha tino koa te iwi ki te kite ia mātou, mahana ana tōku ngākau i tērā mahi.”

Kotahi marama te waka o te HMNZS Canterbury e ngaro atu ana ki ngā whenua o Vanuatu i pokea nei e ngā āwha nui, heoi ano ko te āwha iti o Tāmaki tenei e pohiri nei i te waka me tōna tira ki te wā kainga, kua hoki ora mai ki o rātou whānau.

Ki tā Pīpīwharauroa Campbell, “Tino mokemoke ahau ki te haere nō te mea he tamaiti nāku e rua ōna tau, na te mea tino harikoa ahau i tēnei wā ki te hoki mai.”

E ai ki a Maxine Kearns, “Mīharo rawa tōku whānau mō taku haerenga, me tōku whānau hoki o te Ika ā Māui nei kāre e kore kei te mātakitaki mai rātou, i runga i te koanga ngākau.”

Te ahua nei kua tae mai tētahi āwha i te rā nei, me te aha e kore pea e memeha, nau mai hoki mai te karanga a Tāmaki Makaurau.

Ki tā Kearns, “Ae te koretake o ngā huarere, i putua mātou e te ua ia mātou e tatari ana ki te kuhu mai, engari kua tae mai, koira te mea nui.”