Kua hōhā katoa ngā kaihautu taraka ki ngā huarahi mōrearea rawa

Aroha Treacher
  • Te Tai Rāwhiti

E ai ki ētahi o te hunga hautū i ngā taraka kawe rākau i Te Tairāwhiti, ē hoha katoa ana ratou i te hakurara o ngā rori ka whakamahia e rātou ia rā.

Nā te pikinga marika o nga mahi ngahere, e kaha patua ana ngā rori ia ra, ia ra, nā kona, he uaua ngā mahi whakapaipai rori. Heoi, ki tā ngā kaihautu taraka nei, nā taua āhuatanga i mōrearea ai te hautū waka ki aua rori, a, e noho whakaraerae ana ratou ko tangata kē atu.

Ko ngā rori e kōrerohia nei ka kaha whakamataku i ngā mahi a ngā kaitaraiwa taraka.

E ai ki tētahi o ngā kaitaraiwa, ko Anthony Spencer, “he tino mōrearea aua huarahi, tokorua ngā kaitaraiwa kua mate i runga i ēnei rori i tēra tau.”

Ko te hiahia nui a ngā kaitaraiwa taraka, kia rite tonu, otira, kia tika hoki te whakapaipaitia o ngā rori. Ki te hautūhia he taraka, e whā tekau mā whā tana te taumaha, ki ngā rori hakurara, kāore e kore, he aituā waka ka whai atu.

Ko tā tētahi kaipakihi Māori ko Eru Wharehinga, “Ko te raruraru o ngā rori, he nui ngā koare, he ruturutu ngā waka, kaha ki te turuturu mehemea kaore he rakau ki runga, me he rakau kei runga i to waka, ka ahua tau engari ka kaha ki te ruturutu ka mate ngā taia ēra momo mea katoa, ka titorea etahi wai.”

Nō reira, i whai mātou i te huarahi o Mata, he rori kōpikopiko, he tāheke, he whāiti hoki, otira he rori kirikiri he tekau mā iwa kiromita te tawhiti, a, ko te reo irirangi RT anake hei ara korero, hei tiaki hoki i a koe.

Ki te hautūhia tetahi taraka kikī ana i ngā poronga rakau ki taua rori koawaawa nei, he aitua nui pea te mutunga mai.

E ai ki a Tom Stone o Stone Enterprises, “Kei te mohio tonu tātou ko ngā pakihi ko te mea tuatahi ko te tāra ko tatou nei ngā kaimahi kei te whai atu i te tāra engari kia kore tatou e whara ko tēnā te mea nui, te haere mai au te mahi kia hoki pai au ki te kainga.”

Huhua ana ngā amuamu kua tau atu ki te kaunihera ā rohe o Turanga Nui a Kiwa, i a tūmatanui, i ngā kaitaraiwa taraka ano hoki, engari, ki tā rātou, he taringa kōhatu te kaunihera.

Ko tā te Koromatua o Tūranga-Nui-a-Kiwa ko Meng Foon, “Kei te tara kaha matou hei whakapai he rori, kua whakarongo au ki ngā hapori e kawea mai enei nawe ki taku tari.”

O te tahua pūtea, he rima tekau miriona tāra a te kaunihera i te tau, he rima miriona ka whakapaua hei whakapai i ngā rori o te takiwa. Ko ta te kaunihera, he nui noa ake ngā taraka e whakamahi ana i ngā rori i era i pōhēhētia, nō reira, kei te whakahaerehia e rātou he tirohanga motuhake mo te ara o Mata kia tohua ai ngā wāhi hei whakapaipai.

Kei te tipu matomato te mahi ngahere. I tērā tau he rua rau rua tekau mā rima miriona tāra i puta i te rohe o Te Tairāwhiti noa. I tēnei wā kātahi te pukumahi o ngā kaimahi, heoi, tē tāea e rātou te whakatutuki i ngā mahi katoa.

Nā te hiakai o te ao ki ngā rākau, kei te tuwhera te poi o Tūranga-nui-a-kiwa mō ngā hāora rua tekau mā whā i te ra. Kō atu i te toru rau rima tekau ngā kawenga rakau ka heria mai e ngā taraka ki konei ia rā, a, ko te otinga ake, he tekau mano tana poronga rakau ia rā.

I te tau rua mano mā rima, he toru rau rima tekau tana noa iho te rahi o ngā rakau i whakamahia peneitia, heoi ko te matapae mo tenei tau, ka rua ira rua miriona tana ke ka puta i te poi o Tūranga-nui-a-kiwa. Ko te hua o taua pikinga tana, ko te hua moni nui rawa.

Otira, he hua era kua puta i ngā whakahekenga tōtā a ngā kaimahi pēnei i a Anthony Spencer. Kua hautu taraka ia mo ngā tau rua tekau neke atu. Ka hautu waka ia ki ngā rori o Te Tairāwhiti, he tekau mā whā hāora ia rā, i nga ra e ono o te wiki, a, e hia ke nga wheako kua pupu ake i taua wa.

I te wā e kimihia ana he rongoa, kei te haere tonu nga mahi, kei te taraiwa tonu ngā kaitaraiwa taraka me tumatanui ano ki aua rori tonu. E matapaetia ana ka nui tonu ngā mahi ngahere tae noa ki te tau rua mano rua tekau mā whā, engari, e tumanako ana ēnei kaitaraiwa taraka, ka kore ratou e mate ki te tatari i nga tau tekau kia kitea ai he rongoa.