Kaupapa: Te Rōpū Taurima Trust

Kua heke te Heamana o Te Rōpū Taurima

Rahia Timutimu
  • Tāmaki Makaurau

Kua tīmata ake tā te Manatū Hauora arotake motuhake i te ratonga hāpai hauā o te Rōpū Taurima o Manukau, whai muri i te rewanga ake o ētahi heitara whakapau pūtea hē.

Ko Te Rōpū Taurima o Manukau anake te ratonga hauora whai kaupapa Māori mō te hunga hauā.  He toru rau āna kiritaki, ā, he rima rau ōna kaimahi kei ngā whare rima tekau mā whā, ki ngā takiwā e whā.

E ai ki tētahi o āna kaimahi, “ Ko te oranga o te kaupapa te mea nui he kaupapa tēnei e tautoko ana i te hapori hauā he pōuri rawa mēna ka hinga a Te Rōpū Taurima.”

I whakatakoto nawe ētahi kaimahi tokowhā o mua o Te Rōpū Taurima ki ngā Pirihimana i tērā wiki, ko te ngako, ko te nui o ngā pūtea kua whakapaua ki ētahi nama a te tarahiti.

Ko tā tētahi i whakatakoto nawe, “ka noho harikoa ngā kaimahi nā te mea e mohio ana rātou e mohio ana te iwi whānui ki ēnei raru inaianei.”

I puta i te tarahiti tāna whakatau ake i te rangi nei, e mea ana, whai muri i tētahi hui me te Manatū Hauora i tērā wiki, kua heke te heamana a John Marsden, ā, kua whakatūria ake tētahi heamana o te wā.

Ka arotake anō te kaiōtita motuhake i ngā whakahaere o te tarahiti, ā, ka tohua ētahi kaitohutohu tokorua hei tautoko i te tāhuhu rangapū a Malcolm Robson.

Ka tīmata ake te arotake hei tēnei wiki, ā, kua tohua e te Manatu Hauora he kaitaunaki, a David Russell, hei tohutohu i te poari o Te Rōpū Taurima.