Kaupapa: Politics

Kua heke iho a Norman rāua ko Sabin i a rāua tūranga

  • Te Whanganui-ā-Tara

He rā rihaina i te Whare Pāremata i te kaiārahi takirua o te Rōpū Kākāriki me te mema pāremata mō Te Raki a Mike Sabin e heke iho ana i o rāua tūranga.  Heoi, kua tamia te whakawāteatanga o Sabin e te whakapae e aruarutia ana ia e te tari pirihimana.

Kua ngutu kukū te Pirimia mō Mike Sabin, ā, kāre i tino rerekē i te rangi nei.

Karekau a John Key mō te whāki inahea whakamōhiotia ia mō te take e whakataumaha ana i a Sabin, waihoki, kāore mō te whakautu pātai pēnā he kōrero i puta i mua i te kōwhiringa pōti.

Ko te whakapae e aruarutia ana a Mike Sabin e ngā pirihimana mō tētahi amuamu mōna.  Ināianei ka kōkiritia tētahi kōwhiringa motuhake.  Ko te uri o Ngāti Hine ko Willow Jean Prime tērā i whakataetae i te turu mā Reipa i te kōwhiringa kua taha.

Kāti, i te Whare Mīere he wairua rerekē i te whakapuakitanga ka heke a Russel Norman.

Arā, ētahi kaipōti kaore i rata ki te take nō Ahitereiria a Norman.

Ka noho tonu ko Metiria Turei hei kaiārahi wāhine, ā, e meatia ana ko Kevin Hague te makau.

Heoi, ko te uri o Ngāpuhi me Te Roroa, ko David Clendon, hoki tētahi ka whakatū pea i tōna ringa.

Kāti hei te hui a tau a ngā Kākāriki i te marama o Mei mana ai te hekenga o Russel Norman, ki reira whakaīngoatia ai hoki te kaiārahi takirua hōu.