Kaupapa: Te Reo Māori

Kua eke te Kura Reo o Ngāti Kahungunu ki te tau tuarima

Aroha Treacher
  • Te Tai Rāwhiti
Te Kura Reo o Ngāti Kahungunu 2017 - Image / File

Kua paparuatia te rahi o ngā tāngata e haere mai ana ki ngā Kura Reo o Ngāti Kahungunu ki tō rātou kura reo tuatahi e rima ngā tau kua hipa. Heoi nā te hōtaka hōu mā ngā tamariki i ngā hararei, koinei tō rātou tau rahi rawa atu.

Kei te whai ngā tamariki mokopuna i ngā tapuwae o o rātou mātua.

E ai ki tētahi tauira a Tama Kirikiri, “Koinei te mea pai ki āhau kei haria mai āku tamariki ki tēnei kaupapa he tamariki kohanga reo rāua, ko tāku e whakaaro ai me haria mai rāua ki te kite ētahi atu tāngata e kōrero reo māori ana a Kahungunu nei.”

Koinei te wā tuatahi i whakatūngia he hōtaka tamariki, kia waatea ai ngā mātua ki te haere ki ngā karaihe reo.

Hei tā te Kaiwhakahaere a Tātere MacLeod, “Mō te nuinga koinei anake te wā e noho rumaki ai te tangata ki waenganui i te hunga kōrero māori nā reira e koa ana au kei kōnei ngā tamariki e whakarongo ana ngā taringa ānei te momo pēnei a Te Manahou i a Timoti ia Te Hau ia Te Karau i a Te Petera ia Kīngi mā ko rātou ngā iho pūmanawa hei whai mā rātou a tōna wā.”

E rua rau tekau mā whā ngā tāngata kua tae mai i tēnei tau, he rua tekau neke atu ngā māngai kohanga reo ngā te rohe whānui hoki.

E ai ki tētahi Mātanga Reo Māori a Timoti Karetu, “Kua kitea te kaha o te tahuri mai a Kahungunu i tōna reo kua kaha te haramai i ngā kura nei engari nā te akiaki o Tātere mei kore ake ia e kaha pēnei o te ora o ngā kura reo o Kahungunu nō reira me mihi tērā tangata e Kahungunu engari me mihi anō ki a Kahungunu ki te rangatahi o Kahungunu e haramai ana ki te tautoko i te whakaaro me ora te reo o Kahungunu.”

Hei tā te Manukura Tane o Te Aute a Tauawhi Bonilla, “He mea pai he hoa i te nuinga o mātou ko te reanga ōrite te taumata reo ōrite nā reira he pai ka tipu tahi mātou i raro iho i tēnei kaupapa.”

He kōtahi wiki te roa o te kura reo, i kōnei e ako ai ngā tauira i ngā tino mātanga reo māori o te motu.