Kaupapa: Koroneihana

Koroneihana - Pūrongo Motuhake

Wepiha Te Kanawa
  • Waikato/Te Waiariki

Tere pīpī whākao ai te motu ki te marae o Tūrangawaewae, ā ko Whāea Kawe Nikora tērā, me āna "anahera" e taka ana i ngā kai mā te tini.

Tērā ngā panonitanga ki te wharekai o Tūrangawaewae, a Kimiora, nō ngā rā o mua, he muratahi, he tima noaiho hei tao i ngā kai.

Heoi kotahi pea te mahi e kore e taea te karo ki Kimiora, ko te horoi rīhi tēnā.

Hei ta Kawe Nikora, “I te wharekai tawhito o Kimikimi, i whakamaroke mātou i ngā rīhi, i horoi hoki me ngā ringaringa.”

“Ināianei he mihini tā mātou, ā, he tokoiti noaiho me mahi, nō reira kimi mahi tā mātou, kāore rawa au mo te whakahē i te hunga e hiahia ana ki te tautoko mai.”

I tēnei tau ko te Ki o Rahi te tākaro nui a te haukainga, nō reira kua tāpiringia ia ki te rārangi tākaro hei whakaatu i ngā pūkenga o ngā toa o te motu, o ngā kura tuarua a Rakaumangamanga.

Koinei te Koroneihana tuawaru o Kingi Tūheitia, ko Rahui Papa tētahi o āna kaitohutohu. He nui ngā panonitanga o te Kingitanga i ngā tau kua pahure, heoi ko tāna kei reira tonu te pūtake o te kaupapa.

Kei te pakari tonu te wairua o te Kingitanga, i runga i te whakaaro ko tana kaupapa kaore i rereke. I a Te Wherowhero ko tana kaupapa ano ko te mahi a Te Kingitanga ko te whakakotahi, i a Te Arikinui ko tana mahi he whakakotahi, i a Kingi Tuheitia ko tana mahi whakakotahi.”

Kei reira hoki ngā wero ki te Kingitanga, me ngā awangawanga kua puta ko wai ka tū hei kingi nā ngā mahi hē o tētahi o ngā tama a te Kingi.

Hei ta Rahui Papa, “Ko te tamaiti nei i hē, engari kaore nei na te hē ka rukeruke noiho ki roto i te awa toromi ai, ko te whakaaro ake, he pehea te whakakorowai i a ia, he pehea te tau manaki i a ia kia kore e tuaruatia te hē.”

Karahuihui mai anō. Kei te takiwā o te tekau mano ngā tāngata ka eke ki runga o Tūrangawaewae Marae i te wiki e hāere ake nei ki te whakanui i te Koroneihana o Kingi Tūheitia.