Ko te wiki tōrangapū Māori kua nunumi atu

  • Tāmaki Makaurau
  • Te Whanganui-ā-Tara

Ahakoa e whakatā ana te whare pāremata mō ngā wiki e rua, e puea ake tonu ana ngā take tōrangapū i te ao Māori. Mai i te tohutanga o te tumu whakarae hōu o Whakaata Māori ki te pire tuatahi o tētahi mema pāremata Māori, katoa i whakakōpanihia e tā mātou karere take tōrangapū e Maiki Sherman.

Kua whakahōnoretia ia mō tana whakapeto ngoi ki te ao mātauranga, ā, i te Kīngi Māori e karanga ana kia hui tahi ai ngā kōhanga reo, he akiaki tō Tā Toby Curtis.

Hei ko taana, “Me kaha rā rātou, me kii tātou, ki te whakauru atu ētahi o ā tātou rangatahi i runga i taua poari, te mea tuarua ki au kauaka e noho ngā mema i runga i taua poari mō ake tonu atu”

Hēoi, te āhua nei horekau te ringa katau e mohio ana e aha ana rā te ringa mauī. Ki tā te poari matua ko Tukoroirangi Morgan tētahi kaiwhakahaere ki Te Pātaka Ōhanga, engari hei tā Tukoroirangi.

“Ehara au i te mema o runga i te kamupene Te Pātaka Ōhanga.”

Kāti, te āhua nei ko te rōpū Mana hoki tēnā kei te noho rangirua, arā, mēnā ka mahi tahi rātou ki Te Pāti Ipurangi, kahore rānei.

Ko tā te kaiarahi o te rōpū Mana, tā Hone Harawira e kii nei “mēnā e ū tonu ana ki tana kōrero kia whawhai atu ki a John Key me Nāhīnara kei kōnei mātou hei hoa tata.”

Ki Te Matau a Maui, ko Meka Whaitiri tērā kua kōkiri i tana pire tuatahi mō te oranga o te awa o Tukituki.

Ā, ahakoa ngā tātā a Reipa, kua hikina marika e Paora Maxwell te mānuka hei tumu whakarae hōu mō Whakaata Māori.

“Ko taku tino pirangi kia haere tonu ngā mahi tino pai a Whakaata Māori” te kōrero i puta i a Paora Maxwell.

Tūturu, ahakoa ngā take tōrangapū o te wā i te ao Māori, me haere tonu ngā mahi.