Kaupapa: Elections

Ko te whare o Mahuta kei runga noa atu i ngā tatau pōti

Election Aotearoa , Te Kāea
  • Waikato/Te Waiariki

E ai ki te tatau pōti a Whakaata Māori mō te tūru o Hauraki-Waikato e kore e māmā tanuku te pōti mō Nanaia Mahuta o Reipa.

Ko Mahuta kē kei runga, ahakoa te tuku taunaki atu a te Kīngitanga ki a Rahui Papa o te Pāti Māori.

E whā rau ngā kaipōti i uiuia i te 11 o Hongongoi ki te tuatoru o Mahuru me te pātai ake ko wai tō rātou tino kaitono mō Hauraki-Waikato.

E 78% te tautoko mō Mahuta, he pūtoru ake i te tautoko mō tōna kaiwhakataetae kotahi a Rahui Papa me tōna 22%.

Ahakoa te pakeke, e kore ngā whika a Mahuta e heke ki raro i te 70%. Ko te tautoko mō te kaitōrangapū pāraeroa nei ko te 77.8% i te hunga 18-24; ko te 86.4% mō te hunga 25-34; ko te 77.6% mō te hunga 35-44; ko te 75.7% mō te hunga 45-54; ko te 77.4% mō te hunga 55-64, ā, ko te 78.7% mō te hunga 65+.

Ko te tautoko mō Papa, he kaiārahi mō te iwi, he mangai hoki mō Kingi Tuheitia, kāore e piki ki tua o te 25% i ngā reanga katoa kia riro i a ia ko te 22.2% mō te hunga 18-24; ko te 13.6% mō te hunga 25-34; ko te 22.4% mō te hunga 35-44; ko te 24.3% mō te hunga 45-54; ko te 22.6% mō te hunga 55-64 me te 21.3% mō te hunga 65+.

Ēngari hei tā Papa, kua hē ngā tatauranga.

"400 tāngata? He nui noa atu o mātau o te marae o Pōhara i te 400. Nō reira e mihi ana ki ngā whakataunga, ēngari ka tāria ake nei: ko te 23 kei reira te kohikohinga pōti whakamutunga," e mea ana a Papa.

I te marama o Poututerangi, nā Kīngi Tuheitia i āmene te tohutanga o Papa hei kaitono mō te Pāti Māori me te kī ake kua nihomore a Nanaia Mahuta i roto i ngā nekenekehanga o Reipa. Heoi nā Mahuta, e noho mai ana i te tūru koni atu i te rua tekau tau, i tuku whakatūpatotanga ka kitea te kaha, te ngoikore rānei o te whiu a te kīngi hei te Rā Pōti.

"Ko te kaha kē o te kaipōti kia tukuna a rātau pōti ā taua rā tika. Nō reira kia whakamanatia tērā o ā rātau nei hiahia, koinā te mea nunui," e mea ana ia.

I tēnei wā, e whakaatu ana ngā tatau pōti i te piripono kaha ki te Rōpū Reipa nāna te 52.6% i riro hei rōpū matua, kātahi ko te Aotearoa Tuatahi me tōna 15.1% whai mai ana ko te toru ko te Pāti Māori me tōna 14.5%.

Ka pakanga rae ki te rae a Nanaia Mahuta rāua ko Rahui Papa i tō mātou tautohetohe #Election Aotearoa ki Whakaata Māori i tēnei Rātū, 12 o Mahuru, hei te 8 karaka i te pō.