Kaupapa: Entertainment

Ko te waiata Mana Whenua e whakanui ana i ngā mahi tiaki i a Papatūānuku

Taroi Black
  • Tāmaki Makaurau

Kua tautapatia te rōpū pūoro Māori a Ihi ki ngā tohu APRA Silver Scrolls hei tēnei wiki mo te waiata Mana Whenua. He waiata tēnei e pā ana ki te tautohenga a te whakatūnga o ngā kainga wha rau waru tekau nui, pātata atu ki te wāhi tapu o Otuataua i Ihumātao, Tāmaki Makaurau.

Ko Mana Whenua te ingoa o tēnei waiata me tana karere me tiaki i a Papatūānuku.

Ki tā Thomas Rawiri, “Ahakoa e noho tāone ana mātou ki roto o Tāmaki Makaurau ka wareware ētahi he whenua taketake ano tēnei wāhi ki te mana whenua, ki ngā iwi o tēnei wāhi.”

E kōrero ana te waiata mo te whakaaetanga a te kāwanatanga ā rohe kia whakatū i ngā whare wha rau waru tekau te nui ki Otuataua i Ihumatao, Mangere.

Ki tā Rawiri, "Tētahi āhuatanga i tino hiahia ki te tito i tēnei waiata ko te āhuatanga e hāere ake nei ki Otuataua kei roto i a Ihumātao, i te Waiohua."

Otira kei te pakanga tonu te hau kainga hei whakahē i te whakatūnga o ngā kainga.

Hei tā Rawiri ano,He wāhi tapu, he wāhi i eke ai ngā waka o Aotearoa ki runga i ngā tau ki muri. Nāreira he wāhi tino whakahirahira tēnei, ehara mo te iwi anake engari mo Aotearoa whānui.”

Ahakoa i tūmeke a Thomas Rawiri mo te tohu a tōna rōpū puoro a Ihi ki ngā tohu APRA Silver Scrolls, ko te kaupapa o te waiata ka rangona whanuitia.

Hei tāna, “I tipu ake ahau i reira, i tipu ake ahau i te taha o te mana whenua o reira. He hoa tata, he whanaunga tata hoki. Nō Tāmaki Makaurau ahau, ōku tīpuna, nōreira āe he whanaunga kei roto i tēnei wāhi.”