Kaupapa: BUDGET

Ko te tūmanako a Manukai Urban Māori Authority kia haere tonu te whakawā rangatahi ki runga marae

updated Heeni Brown
  • Tāmaki Makaurau
Papakura Marae Justice Panel

Ko te taumata whakawā a te Manukau Urban Māori Authority ki runga marae, he kaupapa e whakamātauria, e tautokohia ana ā pūtea hoki e Te Tāhū o te Ture tae noa ki te mutunga o Pipiri.

Heoi, i te kainamutanga mai o te Tahua Pūtea Kāwanatanga ā tērā wiki, kahore e mōhiotia ana mēnā rānei ka whai pūtea tautoko anō rātou.

Ko tā MUMA, e rua ngā momo taumata whakawā ā-iwi pēnei nā i te motu.

Horekau anō Te Tāhū o Te Ture kia mea ake pena rānei ka tautokotia ā-pūteangia anō te kaupapa nei, engari tērā te manako nui a MUMA. 

Tā Reipa e hiahia ana, ko te whakawhānui i te Kōti Rangatahi ki runga marae.

E ai ki a Kelvin Davis, "I ngā whare kōti he whare makariri he wāhi maroke mō ngā rangatahi ka haere ki runga i te marae, he wāhi ahuru, he wāhi pai mā te rangatahi me tō rātou whānau."

E mea ana a Davis kei te takiwa o te kotahi rau mā rima mano taara te utu o te mauhere i te tangata kotahi mō te tau kotahi. Nā, he pai atu kia whakaitingia taua nama mā te whakauru pūtea ki ngā kaupapa whakatika-tōmua. 

Ki tā Davis, "E tata ana ki te tekau, tekau mā rua rānei ngā Kōti Rangatahi ki taku whakaaro e taea ana e te whakanuitia taua nama, he ono he waru anō puta noa i ngā takiwā o te motu."

A tērā wiki, puta te Tahua Pūtea a te kāwana, ki reira kitea ai pena rānei ka whakarahingia ake, ka whakaitingia iho rānei ngā pūtea ki te Taumata Whakawā Marae me te Kōti Rangatahi ki ngā Marae.