Ko Te Tai Tokerau whānui kei te rapu mahere e noho ngā rawa o ngā ngahere

Dean Nathan
  • Te Tai Tokerau

Ko Te Tai Tokerau whānui kei te rapu mahere e noho mai ai te nuinga o ngā rawa me ngā painga o ngā ngahere paina ki te rohe kāinga.  Nā, koinei hoki te aronganui o tētahi hui whakahirahira ki Moerewa i te rā nei.

E ngātahi ana te whakaaro o tēnei minenga kua pahure kē te wā kia mauria atu ngā tuporo mai i te rohe whānui o Tai Tokerau ki tāwāhi.

Hei tā te uri o Ngāti Hine, a Pita Tipene, “Ko te wāriu o ngā pūtea e haere tahi i ana me ngā tuporo me mahi me kani ngā tuporo i roto anō i te kāinga kia whai mahi ai ngā iwi i te kāinga kia noho ai ngā pūtea ki konei.”

Ko te whakaaro kua tae ki te wā me mahitahi ngā iwi mahi ngahere o te rohe hei painga mō te katoa.

E ai ki a Kerei James, “Kia anga mua ai e puta ai he hua ki ngā tāngata nō rātou ngā whenua.  Koia tēnā te kaupapa o tēnei rā.  Ehara i te kaupapa ngāwari he mea pakeke engari me mahi ka taea.”

Mai i Tamaki ki raro he nui ngā ngahere paina ki runga whenua Māori engari ko te maha hoki o aua whenua kei te herea tonu ki raro i ngā rīhi o ngā tāngata nō tāwāhi kē.

Hei tā Pita Tipene, “E mea ana tēnei hui me noho te whakahaere i roto anō i te kāinga.  Koia tēnā te kaupapa nui i konei engari ka kitea tātou a te ahiahi nei ka whiriwhiri i te tini o ngā tāngata i konei tētahi wāhi rōpū whāiti kia anga mua ai te kaupapa.”

Koia tēnā te whakaaro e kore e taea te pēhea me tīmata hoki.