Kaupapa: Te Reo Māori

Ko te reo pōwhiri o Te Tairāwhiti ki ngā manu kōrero o te motu

Te Kuru o te Marama Dewes
  • Te Tai Rāwhiti

Nō te rangi nei whakaeke ai ngā kura o te motu ki te whakataetae rima tekau mā toru o Ngā Manu Kōrero ā-motu ka tū ki Tūranga Nui a Kiwa.

Kei te tū a Manaia Aupouri ki te wāhanga reo Māori mā ngā tuakana. Hei tāna, “E rata ana au ki ngā momo kaupapa ka whakatenatena i ahau anō, i reira ka whakawhanake i ahau anō,”

Ko Paora Whaanga Gilbert te toa ā rohe mō te Tairāwhiti i te wāhanga Rāwhiti Ihaka. Hei tāna he pai kia tōia ngā tauira ki tua atu i ngā wāhi e noho ture ai te reo.

“Me uaua ka kite pea koe i ngā rangatahi e kōrero Māori ana o waho atu o te kura,” te kī a Whaanga Gilbert.

He wheako tēnei e whakapakari ai te tokorua nei i ō rāua pūkenga whaikōrero.

“Kia āhei e au te tū ki taku marae ake, ki te whaikōrero hei whakakanohi i taku hapū otirā taku iwi,” te kī a Manaia Aupouri.

Ko tā Paora Whaanga-Gilbert, “Hei whakakanohi tōku whānau, ōku iwi ōku hapū, tōku kura otirā te Tairāwhiti whānui.

Ko te wawata ia a ngā tauira nei o TKKM o Ngā Uri a Māui, ka āhuareka ai te manuhiri, ahakoa te aha.

Koia ko tā Paora Whaanga-Gilbert, Kia kite rātau i te tino ataahua o Te Tairāwhiti, otirā te ataahua o ngā Māui o konei, ngā tāngata o konei, kia pai tā rātau haramai ki te tūtaki ki a mātau.

Ka pāohotia ngā kōrero ki te ipurangi, ā, hei te ata āpōpō timata ai te whakataetae.