Ko te oranga o te wai Māori he kaupapa nui mā Ngāti Kahungunu

Aroha Treacher
  • Te Tai Rāwhiti

Ko te tiaki i te wai mō nga uri kei te heke mai tētahi o ngā take nui ki Aotearoa nei, he take nui hoki ki te ao Māori, he kaupapa e tohea tonutia ana i tēnei wā. Koira tētahi o ngā take whakahirahira i kōrerotia i te hui ahumoana a Ngāti Kahungunu i tēnei tau.

I roto i nga tau rua tekau neke atu kua hori, kua popo te wai ki Te Matau a Maui, nāreira te takaritarita a Ngāti Kahungunu.

Ko tā te Heamana o Ngāti Kahungunu, “kia mau tonu i te tino rangatiratanga o te mauri o te wai, kia tiaki te wai mo ngā uri kei te haere mai ngā reanga kei te haere engari kaore hiahia mātou ki te tipi hauraro ki to mātou awa o tukituki me mau tonu tatou.”

Nā te matapaki kōrero a ētahi iwi puta noa i te motu mo te wai Māori, ko te tiaki me te whakarauora i ēnei taonga te hiahia matua ki a rātou.

Ko tā te Tumu Whakarae o mohoa nei, ko tā Adele Whyte, “he āhuatanga tino whakahirahira te taiao me te tiaki i te taiao ki a ngāi Māori mā te āta tiaki i aua rauemi me te whakamahi tika i aua rauemi ka tāea te whakapakari ake i te ōhanga Māori.”

Ko te mea nui hoki ki te iwi nei, kia poipoia ai ngā rangatahi, kia tāea ai e rātou te whai wāhi ki ngā hui ā Iwi.

Koinei te tau tuawhā e hautu ana a Ngāti Kahungunu i tēnei hui, he wā hei whiriwhiri i ngā tū take maha, mai i ngā ahumoana puta atu ki te hinu, otira, me pehea nei te ara whakamua.