Ngā kaupapa: Kapa Haka, Kura Tuarua

Ko te mātakitaki arorangi-ā-ipurangi i ngā whakataetae Kapa Haka-ā-motu te huarahi ka whāia hei ngā rā anamata

Heeni Brown
  • Te Tai Rāwhiti

Haruru ana te papa tūwaewae i ngā kapa o Puna B i te rangi nei, tokowhā rātou he kapa kua toa i ēnei whakataetae i ngā tau ki mua, nā runga i tēnā i kīia ai tēnei puna ko tētahi o ngā puna uaua rawa atu.

I wāhi kē atu i te papa whakataetae kei te rere ake te hurō o te iwi i ngā pāpāhoranga ā-ipurangi i mātakitakitia e te toru tekau mā rima mano tāngata huri noa i te motu inanahi.

He tohu pai mā Te Matatini, e whakarite ana i tētahi ara e pāhotia pēneitia ai ngā whakataetae kura tuatahi, kura tuarua me Te Matatini ā muri ake nei.

Kei a wai te mana onge kāmehameha mō ngā whakataetae haka?

Mō te rima tau e haere ake nei, ko Aotearoa Kapahaka Limited tērā ka noho hei kaitiaki i ngā pāpāhotanga a Te Matatini, i ngā rohe haka tekau mā rua, ngā kura tuatahi me ngā kura tuarua o te motu.

Pēnei nā te hanganga o tēnei kamupene.

He whitu tekau ōrau o ngā hea, he mea pupuri e Te Matatini, e ngā rohe haka tekau mā rua, e te komiti whakahaere i ngā whakataetae kura tuatahi, e te komiti whakahaere i ngā whakataetae kura tuarua.

Ko te toru tekau ōrau o ngā hea ka riro i ngā kaiwhakanao ka aro pū ki ngā matāpono o Te Matatini.

Nā, ka noho ko ngā whakataetae kura tuarua ā motu hei tauira mō ngā pāpāhotanga haka ka whai mai.

Ā, ko tā Aotearoa Kapahaka Limited he tuku i ngā whakaahua haka hei hoko mā ngā tāngata e noho ana ki waho atu o Aotearoa pēnei i ērā kei Ahitereiria mā te pāpāho ā-ipurangi

Ko te whainga a Aotearoa Kapahaka Limited, he hua moni e rua miriona tāra te nui ia tau.

Ko te tākiritanga pea tēnei o te rā o te haka mō te moni, hei oranga mo te haka me ōna rohe.

Kia mōhio mai koutou e ngā iwi, kei te hōngere o Te Reo ngā kapa e iwa, ka eke ki te mura o te ahi o te whakataetae kapahaka o ngā kura tuarua o te motu, atu i te whā karaka i te ahiahi o te Rāmere.

Ko te mahere hoki a Aotearoa Kapa Haka Ltd, me Whakaata Māori, e mea ana, kia whakapaohotia e Whakaata Māori ngā mahi o Te Matatini, ka tū ki Ōtautahi, ā te tau e tū mai nei.