Ngā kaupapa: Fitness, Youth

Ko te kaiwhakahaere o tētahi whare mekemeke ki Manurewa e aronui ana ki ngā tamariki

  • Tāmaki Makaurau

He whare mekemeke nā te hapori mō te hapori, he kaiwhakahaere e aronui ana ki ngā tamariki, ki ngā whānau e taumahatia ana e ngā utu, he koha noa mēnā ka taea.

Ko te whāinga nui o te whare mekemeke o Vili's Gym i Manurewa, kia kaua ngā tamariki e karore i ngā tiriti, e taka ki ngā whakawai o te kino. 

Ehara i te whare whakapakari kaimekemeke anake engari he wāhi ako, he wāhi haumaru, he wāhi whakawhanaungatanga mō ngā momo iwi katoa.

E ai ki a Otisa Vili, “He Inia, he Āhia, ehara ngā tohutohu mo ngā tamariki moutere anake, engari mō te katoa.”

Ki tā Cammy Subritzky-Vili, “He whakapakari o rātou tinana, o rātou hinengaro anō, ā, ka tū rātou hei tauira mō ētahi atu tamariki i te hapori nei, ka tāea e rātou ahakoa te aha.”

Kua tekau tau neke atu tēnei whare mekemeke e tū ana ki waenga i te hapori o Manurewa, me te mōhio anō a te kaiwhakahaere a Vili, he wāhi uaua tonu mo ngā whānau o konei ki te utu kia haere mai a rātou tamariki ki ana karaehe.

Hei tā Vili, “Kāre he utu mō ngā tamariki mēnā kei te taumahatia ngā mātua, engari a te wā ka tāea he paku koha mō te hiko me te wai, ma te aha i tēnā.”

Nā runga i ngā tautoko a te TTCF arā The Trust Community Foundation me ngā pākihi o te hapori, e tāea ai e ēnei tamariki mokopuna te whai i a rātou moemoeā.

E ai ki a Vili, “Ko te awhi i ngā tamariki o te hapori kia kaua e karore i ngā tiriti, kia kaua e taka ki te hē, na ngā koha a te hapori i eke ai ngā mahi.

Hei tā Cammy Subritzky-Vili, “Kia haumaru rātou mai ngā mea kino, ngā kēnge, waipiro, tarutaru, kia pakari, kia ora.”