Kaupapa: Health

Ko tā Māui's Hook he whakakōrero i te whakamomori

Te Kuru o te Marama Dewes
  • Tāmaki Makaurau

He pakipūmeka hou a Māui’s Hook nā te kaimātai hinengaro a Paora Joseph e tō ana i ngā kōrero whakamomori ā ngā whānau e rima ki mua i te aroaro.

He pakipūmeka tēnei e whakakōrero ana i te whakamomori, i te pouri me te āhua ia o te whakamāui ake.

Hei tā te kaiāhwina matua hei tā Quinton Hita, "Ko ngā whanaunga e matemate nei mokopuna ana rātau. Me mutu te tūkino i ngā mokopuna nei. Me hura te hōhonutanga o tēnei kaupapa ki te ao."

He kōrero pono mai ngā whānau kua rongo i te mamae o te whakamate ake, ka whakarākei ki ngā mahi whakaari a tētahi tāne e amo ana i ngā taumaha, kia rere ngātahi ai ngā kōrero i te kiriata.

Ko tā te kaitohutohu ko tā Paora Joseph, “A lot of those social issues come through colonisation, there's a lot of identity issues that our rangatahi face, I think the film embraces a lot of those issues, it brings them to light but in a compassionate way.”

Ka whakaatu i te haerenga a ngā whānau ki Te Rerenga Wairua, ā, ka tū ki ngā marae kia kōrero, kia whai māramatanga, kia whakamāui ake i ngā mamae.

“Incredibly brave, incredibly vulnerable and saying look this happened to us, this could happen to and if it does happen to you don't be afraid, talk about it,” te kī a Joseph.

E whai ake nei ka haria te kiriata ki ngā hapori, ki ngā marae puta noa i te motu.

Uiui ki te whakatūwheratanga ōkawa o Māuis Hook

TE KURU DEWES

Kāti ake rā, kei konei awau me Quinton Hita, koia te kaiāwhina matua o te kiriata nei. E Quinton, tēnā, he aha rānei te whakaaro matua i rewa ake tēnei pakipūmeka?

QUINTON HITA

E aroha ana ki te tini o tāua e tūkinongia ana e tēnei mate. I timata pērā mai te pikitia nei i runga i tērā wairua. Nā tētahi kaumātua anō i roto i te pikitia nei te kōrero, horekau i a mātau te rongoā, engari horekau he hē o te kōrero. Tēnā pea āianei mā te kōrero tahi, ka kite ai he huarahi, he oranga kei konā mō tātau. Koia tērā ko te wairua o tēnei kaupapa.

TE KURU DEWES

Tēnā koe. Nā, tētahi atu take, kua rerekē ngā tikanga Māori i ngā tau e pā ana ki tēnei mate whakamomori. Tēnā koa homai o whakaaro e pā ana ki ērā tikanga Māori kua rerekē haere nei.

QUINTON HITA

Ko te mea kē i mau ake ai ahau i roto i ā mātau hīkoikoi i te rima tau i mahi i mātau i tēnei kaupapa, e kua tino huri kē tēnā hakaaro i āianei nā. Katoa katoa ngā tāngata kotahi anō hakaaro, patua te hakamā. I mauria rā e ō tāua tūpuna i mua rā nā te Pākehā kē tērā hakamā i uta mai ki runga i a tāua, i runga i ngā tikanga o te hāhi i tipu ake rā rātau i taua wā rā nē. I tanumia kētia rā o tāua whanaunga i waho o te tapu, kahore ki roto, ā, kua rerekē te titiro i āianei nā patua te hakamā. Kaua tātau e tuku i te hakamā kia rapa tonu ki a tātau me a tātau tamariki, e kore tātau e ora i tēnei mate mehemea ka rapa tonutia tātau.

TE KURU DEWES

Tēna koe matua tēnā koe kua whakawātea mai ki a mātau o Te Kāea, nō mātau te waimarie. Tēnā hoki koe i o kōrero whakamārama.