Kaupapa: Te Reo Māori

Ko tā Kaipara ehara tana toa i te toa takitahi

Mānia Clarke
  • Tāmaki Makaurau

Hei tā te toa whakaihuwaka mō te tohu Kaikawe Kōrero i Ngā Take Māori o Voyager, hei tā Oriini Kaipara, o te hōtaka o Native Affairs, inā te nui o ngā whakamānawa ki tōna whānau me ōna hoa kaimahi. I whakaingoa ngā toa i te pō tuku tohu pāpāho ā tuhinga, ā reo irirangi, ā pouka whakaata, ā matihiko anō hoki i Tāmaki Makaurau.

Hei tā Kaipara ehara tāna toa i te toa takitahi, engari he toa takitini.

“He hōnore nui tēnei mōku, ka mutu mō māua ko taku māmā,” i kī atu ia.

“Mei kore koia kua kore rawa au e whai wāhi ki tēnei taumata o ngā mahi pāpāho. He mihi kau ki aku hoa kaimahi i Whakaata Māori, Native Affairs.”

I rangahaua motuhake ake e Kaipara te whakatau a te kōti Whānau kia aukati i tētehi tamaiti e whitu ngōna tau ki te haere ki te kura kaupapa Māori. Nāwai nāwai i tahuri te whakatau i te Kōti Teitei.

“I rongo au i te tangi o te kuia me tana tamāhine e tohe ana kāre tētahi paku tāngata i te aro ki ō rāua reo ki ō rāua tangi kia whai wāhi tā rāua tamaiti ki roto i te kura kaupapa,” i mea atu ia.

Ko Kaipara te toa whakaihuwaka mō te wāhanga hei kaikawe kōrero i ngā take Māori. Mō ngā take Toi, Ngahau me te Āhua Noho, ko Hikurangi Jackson o Marae i eke panuku. Mō te pūrongo auaha ā matihiko, ko NZ Wars: The Stories of Ruapekapeka nā te reo Irirangi o Aotearoa i angitū.

Ko te uiui ki a Taika Waititi me ngōna whakaaro me te whenua taurikura o Aotearoa tētehi o ngā pūrongo a Jackson.

“He tino hōnore kia whai i tēnei taonga, kia wini i tēnei tāonga me kī,” i kōrero atu a Jackson.

Ahatia he pō manahau tēnei, ko tā Kaipara ko te kupu akiaki ki te hunga taiohi kia whai atu.

“Kia ū koe ki a koe anō. Kia ū koe ki tō reo, ki ngā akoranga i whāngaihia ki a i a koe e tamariki ana, i āu mātua, i ōu tīpuna. Ka mātua i tēnā,” i mea atu a ia.

Mai i ngā toa mātanga ki ngā tauhou e tohu nei i te huhua o ngā take Māori e kōrerotia tonutia ana ki te ao.