Ko tā ētahi ākonga he māro rawa te whakawhiu a te kura

Mere McLean
  • Waikato/Te Waiariki

Rua tekau mā toru ngā ākonga nō te Kura Kōhine o Rotorua kua whakatārewahia whai muri i tētahi mahi i tū ki te kura i tērā Rāmere, ā, ko te manukura me tōna tuarua ētahi o rātou.

Tōna tikanga ka tū a Moerangi Vercoe ki te tuku i tāna kauhau ki te hui whakamoemiti i ngā tauira tuakana i te rangi nei, heoi i whakahekea ia i tōna tūranga hei manukura.

Nā te tauira tuakana nei tētahi ngahau i whakarite ki te whakanui i te otinga o te tau, ka whakatūria ki te puna kaukau o te kura.  Kāore te kura i amuamu mō tēnā, heoi nō muri i te ngahau ka wehe ohorere ake ētahi o ngā tauira mā runga i ō rātou waka, ka mahue te haere ki ngā akoranga e rua i te toe tonu, he mahi poka ture e ai ki te kura.

E whakapono ana a Moerangi me ōna hoa ākonga, "Kāore i tika te whakawhiu i utaina, ā, kua takahinga tō rātou mana."

Ko tā te kura, mōrearea ana te hautū waka a ngā ākonga i a rātou e wehe ana i te kura.

Hei tā te tumuaki, tā Ally Gibbons, "Kei te hiahia te kura kia noho ngā ākonga i runga i te wairua hākoakoa, heoi he owatemāka kē tēnei mahi ā rātou."

Kua aukati te tumuaki i ngā ākonga mō te toru rā, ā, kua unuhia ake te tipare o te manukura i te manukura me tōna tuarua, he mahi owatemāka anō hei tā ētahi.

E whakapono ana ngā mātua o ngā ākonga me tuku ngā kōhine kia whakaea i tēnei take, ka mutu, he māro rawa atu tēnei whakawhiu a te kura.

Kua tukua te tūnga manukura, manukura tuarua hoki ki ētahi atu.  Ka hoki ngā ākonga kua whakahekea ki te hui whakamoemiti i te kura i te rangi nei, heoi e manako tonu ana ngā ākonga nei ka whakahokia rāua ki ngā taumata i nōhia e rāua.