Ko Rob Ruha rāua ko Maisey Rika ka whakatuwhera i te komohete a John Legend

Wepiha Te Kanawa
  • Tāmaki Makaurau

He tokorua toa ki te waiata ka whakamahana i te papa whakangahau mä tētahi tino tipua o te ao puoro i te pō nei.

Ko Rob Ruha rāua ko Maisey Rika tērā, ka waiata ake ki te konohete o John Legend, me te wawata ia mā rāua e rongo ai a Legend i te reka o ngā oro o Aotearoa.

Mā ō rāua reo e whakatūwhera te konohete o John Legend kua hokona katoatia nei ngā tīkiti.

Me te mea hoki he toa kaiwaiata Māori te katoa.

E ai ki te kaiwaiata, a Rob Ruha, “Kāore au e tino mōhio he aha te take i whiriwhiri ai ko mātou, engari he hōnore tonu tēna pea i runga i te wairua o ōna ake waiata me te ngā kaupapa o ōna ake waiata, me te mea mea nei he tangata iwi taketake ia.”

I tīmata a Maisey Rika me te whakangahau atu ki ngā wāhi pēnei i te hōro o Tāmaki, e ai ki a Maisey koinei tētahi o āna tino wero.

Hei tā Maisey Rika, “I whakaputa āhau, i tono atu au ki te hunga facebook mō ētahi waiata e hiahia ana rātou. Ko ētahi i parakatihi mātou mō tēnei pō.”

He tau puku mahi tēnei mā Rob Ruha, i toa i tētahi tāonga APRA me tētahi tāonga Vodafone. Hei tā te uri o Te Whānau a Apanui he tū tēnei e whakawhanake ai te ao waiata Māori.

Ki tā Rob Ruha, “Kei te whakaputa i tō mātou reo, kei te whakaputa i te kaha o te mau moko kanohi, kei te whakaputa i ngā pūkenga a te Māori ki te waiata, nō reira ko te tū i tēnei pō ehara mō mātou tokotoru anake, engari mō te ao Māori whānui.”

Kātahi anō ka taka te motuhenga mō Maisey, inānoanei ka tū ia mō John Legend.

E ai ki a Maisey Rika, “He tino rangatika ia, he tino toki i roto i tēnei ao tito waiata, he tino tangata mō te tū mō te porotēhi hoki mō ngā tangata kua taka ki te hē, mō te taiao hoki.”

He koha pounamu paku tā John Legend nā Rob rāua ko Maisey ,pēnā ka whai wāhi rāua ki te tūtaki i a ia whai muri i te whakangahau a te pō nei.