Kaupapa: Entertainment

Ko 'Rememberance' he whakaari nā ngā ākonga o Te Whare Wānanga o Aotearoa ki Māngere

Wepiha Te Kanawa
  • Tāmaki Makaurau

Ko 'Rememberance' he whakaari nā ngā ākonga o Te Whare Wānanga o Aotearoa ki Māngere, he whakatīnanatanga o te pūrakau mō tētahi wahine Māori e whai nei ki te whakapūmau i ōna tataihono ki tōna haukāinga o Whangaroa.

Ko William Davis te kaituhi, te ringatohu hoki, ā, ko tāna e manako ana kia whai oranga hou ngā tikanga me ngā kawa Māori.

E whā marama ngā ākonga o Te Wānanga o Aotearoa e whakapau kaha ana ki te whakarite i tēnei whakaari. Mō te kaiwhakahaere a William Davis, he pūrakau tēnei e titi kaha ana ki te whatumanawa.

E ai ki a William Davis, “Ko te īngoa o te whakaari ko Ngā Maumahara 'Rememberance'. E pā ana ki te kōrero, te hītori, ki te oranga o tōku whaea i ngā wā o muri kei runga tona marae ki Whangaroa.”

He tuatahitanga tēnei mahi mau rākau mō ētahi o nga ākonga, ā, hei tā Courtney Kaiwai he wheako tēnei e kore rawa e wareware.

Hei tā Courtney Kaiwai, “He uaua te Mau Rākau, ngā nekehanga waewae me te pupuri i te rākau. Ka rongo te tinana.”

Hei tā te kaiako tikanga Māori a Aaron Henare, ka whai oranga hou ngā tikanga ki ngā ākonga i tēnei whakaari.

Ko Aaron Henare tērā e mea ana, “I roto i taku nei mahi, i whakaputangi ki a tātou nei tauira, hei oho i a rātou nei tikanga, hei oho i a rātou nei kawa mai a rātou nei iwi, mai a rātou nei hapu.”

E ai ki te uri o Tauranga Moana a Maria Taroa, e tūmanako ana ia ka titi atu anō tēnei whakaari ki te ngakau o ngā kaimātakitaki.

Ki tā Maria Taroa, “Kia kāua e kite noiho a karu, kia kāua e rongo a taringa, engari kia rongo a wairua. Mātou i whakapau kaha.”

Ka tū te whakaaturanga whakamutunga o 'Rememberance' āpōpō ki Ngā Tohu o Uenuku whare ki Mangere.