Ngā kaupapa: Education, Māori Language Week

Ko Manukau ko te pouherenga o ngā mita

Mānia Clarke
  • Tāmaki Makaurau
  • Waikato/Te Waiariki

Kei te noho te nuinga o ngāi Māori ki te tāone nui o Manukau na reira ka pēhea te āhua, noho hoki o te reo ki taua takiwā?

Tāmaki ki raro, pouherenga waka, pouherenga tāngata, pouherenga reo.

“He momo mita o te reo kei waenga i te tāone nei,” i mea atu a Tūnuiārangi McLean (Ngāi Tūhoe, Ngāti Maniapoto).

“Ahakoa ētahi o mātou kei te mau tonu ki te mita o te wā kāinga, heoi anō te nuinga, ko tō rātou reo o te nāianei.”

E ai ki te rangahau o Te Ahu o Te Reo ki te Taitonga o Tāmaki, e rua tau ki muri, kua pā kino atu te oranga o te reo i te whakawhanumi o ngā whānau Māori mai i ō rātou wā kāinga ki te tāonenui.

“I tēnā whakawhitinga mai, tērā ko te ngarohanga pea o te reo i roto i ngā kāinga,” i mea atu a kairangahau a Eru Morgan.

“Ko te māwehewehe haere o ngā whānau, kāre i noho tōpu. Ko te māwehe o rātou, otirā, o ngā tikanga anō hoki.”

E whā tekau mano neke atu ngā Māori e noho ana ki te tonga o Tāmaki, ko te nuinga he uri nō Ngāpuhi, ko Waikato e whai atu nei. wheoi ehara i te mea ko ngāua mita e kaha kōrerotia ana i te rohe.

“E kaha rangona ana te reo o ngā kura me kī, haunga ngā reo ā-Iwi,” i korero atu a Akeni Tai Tin, Ngāti Hine, Ngāti Manu, Ngāti Tūwharetoa, Ngāti Hāmoa.

“Kei te nuinga o te wā ka riro ki ngā uri nei i ngā reo o ngā kaihakahaere o aua kura. Te mutunga iho te kōrero o taku matua a Hemi Mokana, tāna mea, te mea nui e kōrero Māori ana.”

“Ko te ao kua huri,” i kī atu tētehi kaumātua nō Waikato a Jeff Haimona-Tukua.

“Ka rongorongo i ahau te āhuatanga o te mita o te reo. Ahakoa te mita o te reo kua Ngāpuhi, kua Tūhoe, kua Ngāti Porou, ko wai atu, ko wai atu. Engari pai te iti i te kore rawa atu.”

E ai ki a Mclean ka rongo ia i ētahi o ngā kaiako e kōrero ana, e whāngai ana i ō rātou mita, ahakoa nō hea rātou, anā, me te kī ā tōna wā e hoki ki te kāinga.