Kaupapa: Health

Ko MacDonald tērā ka whiwhi tohu mō te kaumātua ora rawa atu o Kahungunu

Aroha Treacher
  • Te Tai Rāwhiti

Ko Joe MacDonald tērā nō Porangahau, kua mihia mō ōna whakapau werawera, koia tērā ka whiwhi tohu mō te kaumātua ora tonu rawa atu o Ngāti Kahungunu i tēnei tau.

Engari, ehara ko te korikori tinana anake tāna mahi, inā koia ko tētahi o ngā pou whirinaki o tōna hapori.

He ono tekau mā ono ngā tau o Joe MacDonald, kāore i te pai ki a ia te noho kuri noa iho, ā, ka riterite tāna oma i ngā tiriti o tōna ūkaipo.

Ko ia tērā e whakakipakipa ana i tōna hapori nā te whakapau kaha i ngā tauwhāinga roa pērā i Iron Mān, Iron Māori hoki.

Mēnā kāore ia i te whakangungu, kei te mahi ia i te whare patu ahi, ka keri rua mō ngā tangihanga, kei te whakahaere hoki i te toa kotahi i te tāone.  Kua toru tekau ngā tau neke atu a ia e mahi ana i aua momo mahi.

Ki a Joe, horekau he take o te karo i te whakangungu, i te whā karaka ia ata ka whakangungu a ia kia rite ai tōna tinana mō te tauwhāinga roa.