Kaupapa: Te Reo Māori

Ko arero whero e rere ana mō te mātanga reo Māori i te whare pāremata mō Te Rangi McGarvey.

  • Waikato/Te Waiariki

Ko arero whero e rere ana mō te mātanga reo Māori, he toki whakapākehā reo Māori i te whare pāremata hoki, mō Te Rangi McGarvey. Ā, inā te nui o āna mahi whakapeto ngoi mō te oranga o te reo, e ai ki te Minita Whanaketanga Māori o mua, ki a Te Ururoa Flavell.

He uri o Ngāi Tūhoe, o Ngāti Whakaue me Ngāti Rangi, a Te Rangi Karaitiana McGarvey, e hoki ana ki tōna ūkaipō mō te wā whakamutunga.

He mātanga reo Māori, he toki mō te whakapākeha i te reo Māori kia tukutahi te rongo i ngā nōhanga a Te Taraipunara o Waitangi, a te whare pāremata hoki.

“Koia tētahi o ngā matakahi o ngā tāngata o ngā pūmanawa, ngā pukenga o roto o te whare pāremata e noho nei ki te whakamārama,” i kī atu a Te Ururoa Flavell.

“Me tika te kōrero, me tika te whakamārama, ki te kore ka raruraru katoa te whare pāremata.”

Inanahi i mate ai te whatukura nei, e rima tekau mā rima tau tōna pakeke i tōnā kāinga i Rotorua. Kua roa ia e toimaha ana i te mate manawa.

“Koia tētehi o ngā momo tāngata e ruarua noaiho i te mata o te whenua e koi nei i roto i te āhuatanga o te reo Māori, engari ki te whakapākehā, he pūkenga anō rā, he pūmanawa anō rā ērā,” i kī atu a Flavell.

Ka takoto te taonga o te mate ki tōna ūkaipō i te whārua o Rūātoki, ki Tauarau Marae tae noa atu ki te Rātapu. Ko tōna uhunga ka tīmata hei te tekau mā tahi karaka i te ata.

E ora tonu ana ngāna tamariki tokoono me ngāna mokopono tekau mā rua.