Kaupapa: Tūhoronuku

Kihai te Rūnanga o Ngati Hine i te tautoko i a Tūhoronuku

  • Te Tai Tokerau

I tu te hui ā tau o Te Rūnanga o Ngati Hine, a, i puta te whakatau e kore āna mema, ngā Marae me ngā hapū e whitu e tautoko i te manatū a Tūhoronuku.

Hei tā te Tumu Whakarae o Ngati Hine i whakatūngia ano kia kawe i te tūranga nei, a Te Waihoroi Shortland e kore rātou e whakaae, e whakapono hoki e tika ana kia uru atu ngā nawe o Ngati Hine ki raro i te korowai o Tūhoronuku, kua whakamananhia e te Karauna, kia whakatatu ai ngā kokoraho tiriti katoa o Ngāpuhi Nui Tonu.

I puta te korero i tētahi o ngā māngai o Tūhoronuku, e mea ana, me whawhai tonu te iwi o Ngāpuhi, engari ko ngā pū, kaua e anga nui mai ki roto, hoino, he rereke ano te tirohanga a tenei pou o roto o Ngati Hine.

Ko tā Te Waihoroi Shortland,” Tuatahi me hinga ko Tūhoronuku, ko te Karauna he kongakonga noaiho ia o tenei pakanga ka whai muri atu.”

E wawata ana Te Rūnanga o Ngati Hine, kia kōkiri i āna ake kereme tiriti, kia whakatatu i tētahi whakataunga motuhake me te Karauna.

Ko tā te Waihoroi, “o nga nawe, o nga hapu, e taea te whakahuihui ki roto i ona ake taiwhenua, mo te waahi ki a Ngati Hine ake, e kii nei au, e 40 mano matou, etahi atu iwi kua tatu nga take, kahore e rite ki a matou te rahi.”

Ko Tūhoronuku tēra, ka timata te kawe i āna hui whakamārama i ngā āhuatanga pōti i ngā mema hapū o Ngāpuhi ki tana manatū i tēnei po tonu.

Tekau ma rima o ngā mema rua tekau ma rua o Tūhoronuku ka ahu mai i ngā taiwhenua e rima o roto o Ngāpuhi, ko Te Peowhairangi tēra, e whai pānga ana ki a Ngati Hine, engari hei tā Shortland, kihai ngā Marae o roto o Te Peowhairangi i whakaae kia tu te kaupapa whakamārama mo tōna ake rohe ki runga i tētahi o ōna Marae maha.

Ko tāna ano, “No reira hei whakapai ahua, kia meinga ai i haere atu matou ki roto i a koutou, korero ai kua whakaturia ake ki te paparakauta o te Pakeha.”

He koni atu i te toru mano, rima rau ngā tono i tae ki te Karauna mo Te Whakaaenga hei whakamana i a Tūhoronuku. O aua tono katoa, ono tekau ma toru paiheneti kihai i whakaae ki te whakarerekētanga o te whakaaenga.

Hei tā te Tumu Whakarae o Te Rūnanga o Ngati Hine, ka nanaiore atu a Ngati Hine, ki te pakanga i te pakanga.