Kia wānanga ngā uri Tāmaki Makaurau mō te kerēme a te Kingitanga

  • Tāmaki Makaurau
  • Waikato/Te Waiariki

I te Kingitanga e whakapuaki ana i āna kereme ki roto o Tāmaki, arā tonu ngā pātai kua puea ake e hāngai ana ki ngā kereme kua whakatatungia e ngā mana whenua kei roto o Tāmaki Makaurau. 

Ka whakatakotohia e Kingi Tuheitia tetahi kereeme ki te rohe whānui o Tamaki, toro atu ana ki te raki ki Mahurangi, puta atu ki te akau o Manukau me Piha.

E ai ki a Rahui Papa ‘Kua tata kotahi mano tau a Tainui e ki atu ana, ko Mokau ki runga, ko Tamaki ki raro’.

Engari, arā tonu te mānukanuka a te mema o Tamaki Makaurau a Peeni Henare e pa kau ake ana ki ngā kereme tiriti o ngā iwi kua whakatatū kereme kē me te Karauna ki tēnei takiwa

"Ko reira wētahi raruraru mō tērā kereme tā te mea he nui ngā mana whenua kei roto o Tāmaki Makaurau. Ae me Tainui hoki kua tatu o rātou kereme nō reira ka toko ake te pātai he kereme hou tēnei?’ hei tā Peeni Henare.

Ko Tame Te Rangi, tētahi o ngā māngai o Te Rūnanga o Ngāti Whātua, e whai tūranga ana ki Ngā Mana Whenua o Tāmaki Makaurau, he whakatōpūtanga o ngā iwi tekau mā toru, i whakaea te hokinga atu o ētahi puia tekau ma wha ki ngā karangatanga iwi o te takiwa.

Ko te whakatau a Tame Te Rangi ‘Kahore hoki a Ngāti Whātua e mea ana e whakahē ana i ngā take kua puta ake nei. Mena he wahanga,  me noho marika ki te kōrerō me te Kīngitanga, me Tainui Waka, tērā pea hei roto i tēnei māramatanga ka puta ake me ahu pēhea’

Kua roa te whānau Henare e arataki ana i te Kīngitanga, engari arā tonu ngā awangawanga a te mema paremata o Tamaki Makaurau e pā ana ki ngā āhuatanga whakaea kereme..

"Ko te āwangawanga ki runga i au nei, me kaua te ture tā tātou whakapapa e whakarite, e whakaae, e whakamana" e kī ana a Peeni Henare.

Hei tā Ngārimu Blair, o Te Tarahiti o Ngāti Whātua Orakei i roto i tētāhi kōrerō ā tuhi, me whai whakaaro nui ngā iwi kua oti kē ō rātou whakatau, ki ngā kerēme ā-whakapapa a iwi kē. Ka mutu, e kō tānā, ko tā rātou he aro ki te Karauna me āna whakaritenga.

Nā whai anō, e ai ki ta matou e marama ai, kua whakaae te Minita Take Tiriti kia whakarongo ki ngā kereme a Waikato-Tainui.