Ngā kaupapa: BUDGET, Employment

Kia tipu te ōhanga ki ngā rohe koira te whainga

Mere McLean
  • Waikato/Te Waiariki

Kotahi piriona tāra kua whakapūmautia e te kāwanatanga hei whakawhanake i te taha ōhanga ki ngā rohe i roto i ngā tau e toru e haere ake nei. Heoi, mo te hunga kei Te Moana a Toi kāore rātou e rata ana ki ngā tūranga huarākau kiwi, me te whakahau kia whakarahi ake ngā tūranga mahi pūmau. Kua piki ngā tatauranga mo te whai tūranga mahi ki te ono tekau mā whitu ira waru paihēneti ki roto i a Aotearoa, engari kei konei tonu ētahi e taka ana ki raro.

Ko James Albert tētahi kua roa e kimi ana i tētahi tūnga mahi, “koira tāku he kimi i ētahi mahi, ko au tērā i ngā tau ka huri engari kāre aku mahi inaianei, kua haere au ki te rapu mahi engari auware ake!” I ngā whakataunga o te tahua pūtea ka taurite te tatauranga o te hunga kore mahi mo tēnei tau engari mo Kathleen Honey Isaac kātahi anō ia kia whiwhi i tētahi tūnga mahi pūmau hei tāna me whai wāhi tātau ki te hapai i te hunga rangatahi ki te kimi mahi. “Kei te mōhio au ki ētahi rangatahi, tētahi i te hiahia kia noho hei kaiaka mīhini engari kāre o rātou mātauranga na te mea i wehe mai i te kura, kei a rātou ngā pūkenga engari me whai wāhi rātou”.

Kotahi piriona tāra ki raro i te kaupapa whakatipu i ngā rohe o te kāwanatanga ka whai wāhi ki te whakapūmau i ngā tūnga mahi me te whakawhanake i ngā kaupapa ōhanga ki ngā rohe heoi kua oti kē te tuku i te whitu tekau mā rima miriona o tēnei pūtea ki ngā kaupapa tāpoi, ā, tekau mā toru miriona kua whakarite hei whakatipu i te kotahi piriona rākau. Ki tā Isaac anō “I te mutunga o te rā, kei te tātau te tikanga ki te kimi i tētahi huarahi kāua e noho noa iho ki te kainga amuamu ai”.

Mo te hunga kei te mahi, ko te kōrero ka piki ngā utu mo rātou mā te toru ira wha paihēneti i te tau rua tekau mā rua engari ko te pātai ka nui tērā ki te pupuri i te hunga e noho ana ki ngā rohe, āe, kao rānei.