Kaupapa: Mining

Ki te Whare Māngai o Aotearoa i Te Urupū kawea ai ngā māharahara o ngā kai-whakahē mō Chevron

  • Ahitereiria
Protestors against Chevron outside New Zealand consulate in Perth

E īnoi ana ngā kai-porotēhi i Te Urupū kia āta whakaaro anō te kāwanatanga o Aotearoa i ngā kirimana kimi kōhinu kua tukua ki te kamupene Chevron kia hōpara i te riu o Pegasus. 

He mema o te Uniana Taha Moana o Niu Tīreni (MUNZ) me te Whetereihana Ā-Ao o Ngā Kai-Mahi Waka (ITF) i taki huihui atu ki waho i te whare māngai o Aotearoa i Te Urupū inanahi ki te whakaputa i ō rātou āwangawanga mō tā Chevron whiwhi kirimana i a Aotearoa.

He kirimana e āhei ai a Chevron te hōpara i ngā manomano kiromita haurua o Aotearoa whenua me te moana ki te rapu kōhinu me te kāpuni.

Kei te whārangi ipurangi o New Zealand Petroleum and Minerals te rāpopototanga, e toru ngā kirimana rapu kōhinu i te papa moana ki te riu o Pegasus i tukua i tērā tau ki tētahi "mahinga ngātahi ki waenga i a Chevron New Zealand Exploration Limited me Statoil New Zealand. Katoa ngā kirimana nei mō ngā tau tekau mā rima te roa, katoa ngā kirimana, ko Chevron te kai-whakahaere - ā he 50% te wehenga o te kirimana ki a Chevron me Statoil."

E ai ki ngā kai-whakahē, kua kite pū rātou i ngā mahi a Chevron me te whakapae,  e auē ana ngā hapori i te uru o Ahitereiria e te "korenga o te kamupene i here ki te whakatū mahi, ki te tautoko i ngā pakihi, ki te whakahaumaru kaimahi, ā i pōkia e ngā utu whakatū me ngā whakahaere hoki i tana whakatūnga mai."

He reta i tukua e te rōpu ki te whare māngai o Aotearoa inanahi e whakamārama ana i ō rātou mānukanuka mō ngā whakahaere a Chevron, ā ko tā te Hekeretari Ā-motu o MUNZ, ko tā Joe Fleetwood, "e mahi ana ā mātou mema i te ahumahi nei, e tautoko ana mātou i te mahi keri kia tika, kia tino kounga hoki te marutau, engari kāre mātou mō te tautoko i ngā kamupene kino te whakapapa mahi i te taiao, aronga patu kai-mahi, te kuhu ki tā mātou ahumahi nei.

Ko te whakatau i runga i te whārangi ipurangi o Chevron e mea ana "kua 20 tau mātou e whakawhanake pūnaha ana hei tautoko i te ahurea marutau me te tiaki taiao, kia tino kounga i te ao, ngā whakahaere me te aukati maiki katoa. E karangatia ana e mātou, ko te Whakahaere Hiranga (OE) tēnei, ā koia te kai-kōkiri i ā mātou mahi katoa. E whakapono katoa ana tā mātou ope mahi, he maiki e taea te taupā, ā, he kaupapa here, he pūnaha, he taputapu, he whāinga ā-whanonga hoki wā mātou hei awhi i a mātou ki te whakatutuki i taua wawata.

Heoi, he rerekē ake te whakatau a ngā kai-whakahē i hui ki Te Urupū inanahi. Ko te reta i tukua ki te whare māngai, i mea ai, "nā runga i ngā mahinga a Chevron i te ao, kei te āwangawanga mātou, ka kore e pai te whai pānga o tēnei hōparatanga ki tō taiao, ki ngā whānau rānei. Ko te hītori o Chevron e māharaharatia ana, ko āna whanonga i ngā hapori ka whakawhirinaki atu ai ia, ka tohua e te nui o āna hua. He mahi, he hua ki ngā hapori, he tautiaki i te taiao āna e oati ai, engari tē tutuki i te katoa.

Hei tā te Perehetini o ITF, a Paddy Crumlin, he hītori tā Chevron mō te mahi tāmi kai-mahi me ētahi atu whakahaere kino i āna mahi i te ao.

"Kei te whakamōhio mātou i te iwi o Aotearoa, tērā ko te kamupene nei, he rangirua, ā ko ngā kai-mahi o Ahitereiria kua rongo pū i tēnā."

E ai ki a Wikipedia, i te Āperira i tēnei tau, i puta i a AmazonWatch ētahi kiriata, ko tōna āhua nei, he whakaatu i ētahi kai-mahi me ētahi kai-whiriwhiri mā Chevron e rapu ana i ētahi wāhi kua pokea i te Amazon ki Equador, he wāhi i whakapaetia e te kamupene, i whakapaipaitia i ngā tau i mua noa atu. He kiriata ēnei i whakatuturutia e ngā kai-toko ture o Chevron.

E mea ana ngā kai-whakahē, ko te huihuinga nei te tīmatanga o te hono a Aotearoa ki tētahi kaupapa nui kua horapa i te ao e whakahau ana ki a Chevron kia whakaaro nui ia ki ngā hapori e mahi nei ia.