Kaupapa: Housing

Ki tā te Whare Kaporeihana ka turakina ngā whare 33 ki Maraenui

Aroha Treacher
  • Te Tai Rāwhiti

Tērā te whakatau a te Whare Kaporeihana ka turakina ngā whare toru tekau mā toru ki te rohe o Maraenui, ā, ka hūnukuhia atu ētahi rōpū kairēti, he tekau mā toru te rahi, ki wāhi kē.

Heoi, ki tētahi kaiārahi o te hapori, he huringa tai kē tēnei ki Maraenui i runga i te pai, kia āhua rite ki a Remuera te āhua hei ngā rā kei te heke mai.

Kua kitea noatia ngā whare kaporeihana e noho mokemoke ana ki Maraenui i ngā tau, mai i te wā i nekea rātou e te whare kaporeihana, engari, akuanei ka turakina.

Ki tā te whare kaporeihana ka tūraki ngā whare toru tekau mā toru, nātemea, ka kore e pakari te tū i te rū whenua, kāore rānei e pai ki te nohia e te tangata.

I whakahaerehia e te whare ratonga e Te Rōpu ā Iwi Trust tētahi pūrongo e titiro hōmiromiro ana ki ngā tūāhuatanga whare o Maraenui.

I āta tukutuku te wehenga atu o ngā tāngata o reira mā te tekau mā toru paihēneti, otirā, mā te whakatū o ngā whare hōu, whare utu-iti, ka puāwai anō te taone o Maraenui.

He toru rau waru tekau ngā whare o te Whare Kaporeihana ki Maraenui, he nui ake tērā i te toru tekau ōrau o ngā whare katoa ki reira, ka mutu, ki tā Te Whare Kaporeihana, ka whiriwhiria tonutia ngā whakaaro ki te hapori, me aha kē ngā whenua ka mahue mai.