Kaupapa: Housing

Ki tā te mema pāremata o Tāmaki Makaurau ko ngā whare tonu te āwangawanga nui o te wā

  • Tāmaki Makaurau
  • Waikato/Te Waiariki

E ai ki te mema pāremata o Tāmaki Makaurau, ki a Peeni Henare he kotahi rau ngā reta kua tae atu ki tōna tari i te wiki kua hori, katoa he māharahara ki ngā take whare.

Hei tā Peeni Henare, “Ko tēnei take te kaupapa nui ka tau ki runga i taku tepu he nui ngā whānau ki roto o Tāmaki Makaurau nei e pēhi ana i ēnei mahi a te kāwanatanga.”

E rua tekau mā rua mano ngā whare kaporeihana kaore i te eke ki tā te kāwanatanga e hiahia nei - he rima ki te ono piriona tāra te wāriu.

Ko tā Reipa, e tika ana kia hokona atu ētahi o aua whare, engari me tuku oati te kāwanatanga kia whakahokia aua hua moni ki taua rāngai tonu. 

E ai ki a Peeni Henare, “Ko te hiahia kia tirohia i te mahere ko atu i ngā mahi hokohoko mā tēra ka tino mārama te katoa o te ao pēhea tēnei kāwanatanga ki runga i tēnei kaupapa.  Ki te kore tātou e kite i tētahi mahere ana kei te pō tonu tātou e noho ana.”

Ara ētahi iwi e whai here ana i wā rātou whakataunga kokoraho kia riro ki a rātou te kōwhiringa tuatahi ki te hoko i ngā whare kaporeihana, ko Waikato-Tainui tētahi.

Hei tā Rahui Papa, “He nui tonu ngā whare kua kapohia ake e te iwi, ā mā roto mai i tēnei tūāhuatanga kia tuari noa iho nei ki wō mātou iwi hei hoko mā rātou. Nōreira he kaupapa kua roa e whiriwhiringia ana i waenganui i a Waikato me te Karauna.” 

E ai ki a Rahui Papa he rautaki kē tā te maha o ngā iwi, pēnei ki a Waikato-Tainui, mo te take whare. Ko tana wero kia kaua te kāwanatanga e motu i tana here ki tēnei kaupapa ā-motu.

E ai ki a Rahui Papa, “Mehemea e whai atu ana te kāwanatanga ki te whakakore atu i tana here ki te whakawhare i o tātou tāngata puta noa i Aotearoa ki ngā whare mahana ki ngā whare haumaru a koia tēnā ka tipu mai te āwangawanga.”

Kāti, kāore anō he whakatau kia puta i te kāwanatanga mō te rahi o ngā whare ka hokona atu, mō te whakamahinga rānei o te pūtea ka riro mai.