Kaupapa: Health

Kei Whangarei a Mana Tāne Ora

Heeni Brown
  • Te Tai Tokerau

​E ai ki a Mana Tāne Ora o Aotearoa, ko te maha o ngā matenga tāne Māori ki Aotearoa kua tōpū i ō ērā o ngāi tāne tauiwi. I haere atu ai te rōpū nei ki Whangarei, ki reira kōrero ki ngā tāne Māori me pēhea rā e piki ai tō rātou oranga tonutanga. 

E hīkaka ana tēnei ringa tōhau nui o te hauora i te taenga mai o ngā toki pēnei i a Mike King ki tōnā taone o Whangarei.

Tā Donovan Clarke, Tumu Whakarae ki Te Hauora o Manaia, "He hōnore tēnei ki a mātou hei tū tēnei tō tātou kaupapa. He kaupapa mō ngā tāne, he werowero atu ki ngā tāne me pēhea te huarahi tika." 

Kei te rārangi kaikōrero a Mike e hapai ana i te oranga tāne Māori, ā, mō te kāhui whakaora tāne Māori anō te take.

I whānau mai te kaupapa i te hiahia nui kia whakahekengia te kikino o ngā tatauranga hauora me te whakapiki anō i te oranga tonutanga o te tāne Māori.

Tā Lee Luke o Mana Tāne Ora, "Ka haere ki ngā kokona o te motu kia whakatū tēnei momo hui ki te hāpai i te kaupapa Tāne Ora. He rerekē te kaupapa nei ki tēnā, ki tēnā ō tātou, ēngari i tēnei rā ka tū mai tātou ka tū mai tātou ki Whangarei kia rongo ai i ngā kōrero, ngā whakaaro, ngā wawata e pā ana ki ngā tāne."

Tā Clarke anō, "Te mea nui kia haramai ngā tāne ki te whakarongo ki te whiriwhiri me pēhea te huarahi tika, ki te rongo i ngā kōrero o ngā kaikōrero e tū mai nei e pā ana ki a rātou."

He whānui, he whāroa te kaupapa e noho nei ēnei tāne. Ko te whainga nui kia piki ake anō te oranga tonutanga o ngā tāne Māori huri noa i te motu.