Kei te whawhai te Iwi Moemoea mō te mana o ngā whenua takutai

  • Ahitereiria

Ko te tohe takutai moana ki Ahitereiria. Koia te kōrero a ētahi mo te wero a te Kāwanatanga o New South Wales i te mana a te iwi moemoea ki ngā whenua takutai.

Kua puku te rae i te tini, ā, na tēnā kua whakatārewahia te pire whakarerekētanga. Heoi, e mea ana te iwi moemoea me matāra tonu ka tika.

Koinei te tūrangawaewae o te iwi Gumbaynggirr, te kainga tipu o ēnei kaumātua a Cecil Laurie raua ko Milton Duroux. Katahi anō ka whakamanangia e te kōti tā rātou kereme i tēnei whenua, neke atu i te rua tekau tau nō tōna whakatakotoranga.

Ae mārika he hīkoi roa he hīkoi taumaha mo tēnei iwi.

E tika ana kei te werohia tō rātou kereme, ina e toro ana hoki ki tēnei wāhanga takutai. Ā kua kōkiritia e te Kāwanatanga o New South Wale tētahi pire aukati i te pupuritanga tumataiti o te whenua takutai. He pire ōrite nei ki tērā o te tohe takutai moana ki Aotearoa i te tau rua mano mā whā.

E whakapono ana te iwi Gumbaynggirr koia te tuatahi ki te wikitoria i tana kereme i rō kōti, otira, tata ki te ono rau kiromita e keremengia tonutia ana i New South Wales.  

I rapa te kereme a te iwi Gumbaynggirr te tau iwa tekau mā toru. Kaore i tirohia e te Kāwanatanga tae rawa ki te tau rua mano mā iwa, i reira ka whakahēngia e te Minita. Mai i kona, i kawea e te iwi ki te kōti pira, i reira wikitōria.

Kāti, hei te rua tekau mā whā o tērā mārama tōna tikanga riro ai ki te iwi Gumbaynggirr ngā taitara ki tō rātou whenua nei. Hei tā rātou mā te wā ka kite.