Kaupapa: Elections

Kei te whakaihuwaka a Davis i tōna rohe pōti e ai ki ngā hua rangahau o te wā

Election Aotearoa , Heta Gardiner
  • Te Tai Tokerau

Kātahi te mahi nui ki te turaki i a Kelvin Davis i te tūru o Te Tai Tokerau. E ai ki ngā kohikohinga tatau a Whakaata Māori, ko ngā pōti mā Davis, he pūrua ake i te katoa o te tautoko ki a Hone Harawira o Mana. 

A kei te kitea ngā hua ki tana rohe pōti ki Te Tai Tokerau. Ko ngā pōti mōna kua pūruatia e Hone Harawira nō te Rōpū Mana. Kei a rāua te nuinga o ngā pōti, a ko Godfrey Rudolph nō te Rōpū Kākāriki kei muri rawa e kai puehu ana.  

Hei tā Davis, "E harikoa ana ahau kei mua ahau, ēngari kei te āwangawanga au ka pōhēhē te hunga pōti he moumou wā te pōti mōku i te mea kua wikitōria ahau."

I wikitōria a Hone Harawira i ngā kōwhiringa pōti e toru, kia kotahi hoki te pōti pāerotanga. Engari i mutu ana wikitōria ki reira, i te kōwhiringa pōti katahi anō ka hori ko ia tēra i turakina e Kelvin Davis whai muri i tana hono atu ki te tangata whai rawa nō tiamana a Kim Dotcom. Kua wehe a Hone Harawira rāua ko Dotcom inaianei, a kua awhiawhi anō ia ki te Pāti Māori. 

Engari i tana tuku i te tini o ngā kakari hei Kaikōrero Arapoutama, i tana pikinga hoki hei kaiārahi tuarua mō Reipa, kua whai hua a Kelvin Davis.   

A ko tana tautoko kua horapa ki te katoa, pakeke mai, taiohi mai hoki. 

Kāore a Harawira i hia kōrero mō ngā kohinga pōti o Whakaata Māori. He 400 ngā tāngata i whakakōrerotia, i waenganui i te 11 o Hongongoi me te tuarima o Mahuru. 

Ahakoa ngā whiu ki a Reipa mō tōna kārangirangi mō ngā take, kei te mārō tonu tana noho ki te torōna. 

Me eke ki ngā taumata kāore anō kia kitea i ngā tau, kia huri rā anō te tai ki tēnei rohe.