Kei te whakahē a Ngāti Awa i te tono a te Kaunihera kia whakatū whare pātata atu ki te Urupā

Taroi Black
  • Waikato/Te Waiariki

He taupatupatu kei te haere i te Waiariki i wāenga i te haukainga o Ngāti Awa, me te Kaunihera ā Rohe o Whakatāne, mō te tono kia whakatūngia he whare kaumātua pātata atu ki te Urupā ā te iwi, a Opihi Whanaungakore.

He wāhi taurikura a Opihi Whanaungakore ki te ākau o Whakatāne, koia te urupā mō te haukainga o Ngāti Awa. Inaianei kei te tutū te puehu i wāenga i ā rātou me te kaunihera ki te whakamahi i taua whenua.

Waru rau tau te pakeke o te urupa. Koia te takotoranga o ngā rangatira o Mātaatua. I taha o te Urupa ko tētahi atu whenua no te kaunihera, me tō rātou hiahia kia whakaara ake tētahi huarahi hei whakakaha anō i tō rātou ōhanga. 

I te marama o Haratua o tēra tau i whakamōhiotia te haukainga ki ngā whakahāeretanga a te kaunihera kia whakamahia te whenua me tētahi whakataunga waka pātatā atu ki Opihi.

E mea ana te kaunihera, "Kei te aro rātou ki ngā tikanga me ngā kawa o te wāhi me tā rātou whakaae hoki kia arohaina te whenua o te urupā mō ngā whānau me ā rātou uri e takoto ana ki reira."

A tēra marama ka kawea te tono pīra a te Kaunihera ā Rohe o Whakatāne ki te kōti taiao, ka pūmau tonu a Ngāti Awa ki te whakahē i ngā whakahaeretanga.