Kaupapa: Tūhoe

Kei te whakahē ētahi mō te pōhiri a ngā Pirihimana ki ngā tamariki i pākia i te urutomohanga o Ruātoki

Mere McLean
  • Waikato/Te Waiariki

Kua rere ake te whakahē a ētahi mō te pōhiri a Te Ope Pirihimana o Aotearoa ki ngā tamariki i pākia kinotia i roto i te urutomohanga o Ruātoki i te tau rua mano mā whitu.

Ko te tono kia haere ngā tamariki o taua hapori ki Te Whanganui a Tara, hei whakamāuru i te mamae e ngau nei i aua tamariki.

Heoi, tērā te pātai a ētahi nō roto o Ruātoki me Tāneatua, he aha kē kei tua i te awe māpara.

He tūmahi kua titi ki te ngakau mō rātou i whakaekehia e te ope pirihimana.

Hei tā Te Waiarani Harawira, “I te wā i ekehia ai taku tungane me tana son, me tana tama e ngā pirihimana, tekau ngā tamariki i roto i tana kāinga.”

Kua pōhiri ake ngā pirihimana kia haere aua tamariki i pākinotia ki Te Whanganui a Tara, he karanga kua whakatū nei i ngā pihi o tēnei kuia. 

Te Waiarani Harawira, “Āe, ka whakatakariri tonu au, te kore o ngā pirihimana te hara mai ka āta noho ki te taha o ngā whānau, ka āta whiriwhiri kaupapa.”

I te Hurae i tuku whakapāha a Mike Bush, kaikōmihana pirihimana ki ngā whānau tokoono i whakaekehia, ā, i te Akuhata ka tuku anō i te whakapāha ki te hapori o Ruātoki. 

Mai reira, rima tekau mano ngā pūtea mai i ngā pirihimana kua hoatu ki te Komiti o Runga ki Ruātoki, ko ngā mema nō ngā hapū o te whārua, na ngā mema i pōti kia whakahoki tērā pūtea ki ngā pirihimana.

E ai ki a Te Waiarani Harawira, “Me pēhea e tipu ai te pono i roto i au, ahakoa te whakapāha a ngā pirihimana, me pēhea ahau e pono ana ki ngā pirihimana.”

Kei te hiahia ngā pirihimana kia whakawhirinaki mai te hapori.  Engari mo Mahina Harawira-Fox ko te rā o te urutomo kei te pae o mahara.

Hei tā Mahina Harawira-Fox, “Te nuinga o ngā rori i katia, ngā pahi a ngā tamariki o ngā kōhanga reo i whakaekea e ngā ninjas me kī, ki ahau nei kei reira tonu te mamae.”

Ko ngā whiriwhiri mō tēnei haerenga kei ngā Pirihimana me Te Uru Taumatua, ā ka noho tārewa tonu pea kia hipa rā anō te tau hōu.