Kaupapa: Te Reo Māori

Kei te whakahaere a Ngāti Whakaue i tā rātou kura reo tuatahi

Mere McLean
  • Waikato/Te Waiariki

"Mokoia te reo ki tō ngākau", koinei te poutuarongo o te kura reo tuatahi o Ngāti Whakaue ka haere mō te roanga ake o te wiki.  He kaupapa tēnei e whakahaere ana ki raro o Te Taumata o Ngāti Whakaue.   

He tau whai hua tēnei mō Ngāti Whakaue.  I tērā marama i tū tō rātou whakanuia ā-iwi mō te wā tuatahi.  I tēnei wiki hoki ko te tuatahitanga o tō rātou wānanga kura reo.

Hei tā Kingi Biddle, “Ko te kaupapa ō te kura reo nei, he whakapiki, he whakapiki i te tatauranga, te tātai ō ngā tangata, ngā uri o Ngāti Whakaue e kōrero Māori ana.”

Nuku atu i te ono tekau ngā tāngata kua rēhita mō tēnei wānanga, kia ako i te mita o tō rātou iwi, ngā kōrero tuku iho hoki o Ngāti Whakaue.

E ai ki a Wakamauriri Paul, “He kaupapa tino rawe tēnei mō te whakapakari i a Ngāti Whakaue, nō reira me kaha tātou ki te ū ki ēnei mahi i ngā tau kei te heke mai.”

Ko Biddle tērā e mea ana, “Nō ngā wā ō-mua, ko te reo kōrero tuatahi ō Ngāti Whakaue, ko te reo Māori, ināianei, kua ruarua noa iho nei ngā tāngata matatau ki te reo, ki te kōrero i te reo, nō reira me hoki mai te reo ki Ngāti Whakaue ka tika.”

Whitu mano, toru rau, tekau mā tahi te tatauranga tangata ō Ngāti Whakaue.  Toru rau mano ngā uri kua rēhita ki raro i te iwi ō Ngāti Whakaue, ko te wawata, kia puta whānui te reo Māori ki ngā uri katoa ō Ngāti Whakaue.