Kaupapa: Housing

Kei te whai kaihoahoa whare ki te hanga whare ki Pā Harakeke

Aroha Treacher
  • Te Tai Rāwhiti

Kei te whakawhanake tonu te papa kainga iwi taketake o te ao a Waingākau ki Pā Harakeke, kei te kimi rātou i ngā kaihoahoa whare. Ko te whai o te waahi nei ki te whakakore i ngā mahi tinihanga me te whakarite huarahi mō ngā whānau Māori ki te hoko kainga.


He kōtahi rau rua tekau ngā kainga hou ka whakatūria ki kōnei, ā ko Te Aranga Marae te waahi matua mo aua kainga.
 

"Hei ngā toru wiki ka tono mātou mō ngā kaihoahoa whare, he hoa pakihi mō ngā rā kei te heke mai," tā Emma Horgan, kaihautū matua.


Nā whai anō ko te whakarite i ngā tono a ngā whānau hei ngā marama e toru e ono rānei te mahi ināianei, Ko te hunga nō Pā Harakeke te whainga tōmua ā kei te wātea tonu ngā whare ki ngā iwi katoa ahakoa he Māori kāore rānei.
 

"E whakapono ana mātou ka angitū tēnei papa kainga nātemea he marae ki kōnei, he waahi matapaki," tā George Reedy, te tumu whakarae o Te Taiwhenua o Heretaunga.


"Ko te kaupapa kia hoki atu tātou ki ngā wā o mua, he hapori e kaha tautoko ana rātou i a rātou anō," tā Horgan.


He whā tekau miriona taara te utu mō te kaupapa, e rima tekau ōrau o ngā kainga ka tāea te hoko atu, ko te tino whai hoki kia whakakore i ngā mahi tinihanga.
 

"Mā rātou anō e tiaki, i hangaia te waahi nei kia whakakore i te wairua tinihanga," tā Horgan.

"Mēnā kei te haere pai te perene, ko te hiahia, hei te kōtahi rau ka nuku mai ngā whānau tekau ki ngā kainga, hei ngā whā tau ka haere mai te toenga o ngā whānau," tā Reedy.


Ehara ngā kainga nei i te kainga papori, ko te painga o te waahi nei ko te whakatipu i te hapori haumaru.